GILUSAD ang Bike Clinic Caravan sa Cebu City Environment and Natural Resources Office (CCENRO) kauban ang Sugbo Bike Lanes Board niadtong biyernes, sa Plaza Sugbo ug mulungtad kini hangtod Hulyo ning tuiga.
Kini nga kalihokan mohimo sa pagtudlo kon unsaon pagbiseklita ug pagkat-on usab bahin sa mga balaod sa trapiko aron makabiyahe sa syudad nga luwas.
Ang paggamit sa biseklita isip alternatibong transportasyon padulong ug pauli gikan sa trabahoan ug eskwelahan, maoy usa sa makatabang sa dakbayan nga mominos ang polusyon ug malikayan nga matanggong sa trapiko.
“To promote the use of biking as an alternative mode of transportation ug helping to promote the use of bike among children and adults,” saysay sa Mayor’s Office, Sugbo Bike Lanes Brand, Atty. Delight Ladat.
Nunot sa pagbutang ug Bus Rapid Transit dinhi sa Sugbo konektado usab niini ang posibleng pagpwesto og mga bike lanes.
“Biking will always be an integral part of our transport system, as far as BRT are concern... there are always bike lanes, you cannot separate BRT and bike lanes,” asoy ni Engr. Paul Villarete, City Administration.
Adunay 4 ka modyul ang dapat buhaton sa moapil sa bike clinic ug kini ang pagtudlo sa basic biking, preventive maintenance ug traffic safety education.
Human niana pwede nang mopadayon sa actual biking sa dalan sa siyudad ug dili angay mabalaka tungod kay naay bike caps kuyog sa Cebu City Police nga makagiya sa mga nisalmot.
Ang bike clinic caravan buhaton karong buwana hangtod sunod buwan ug ang venue mao sa lainlaing eskwelahan apan sa buwan sa Agusto naglaum sila nga aduna nay permanente nga lugar alang niini.
Giawhag usab ang boyscouts ug girlscouts kon mamahimo bang moapil sila sa pagtudlo hilabi na kon ang bike clinic mahitabo mismo sa ilang eskwelahan.
Gilangkuban ang kalihukan sa Department of Public Works and Highways (DPWH), Cebu City Transportation Office (CCTO), CCPDO, TMB Two Wheeled Motorized Vehicle, City Government ug Bike Community.
Dugang pa, dunay gibanabana nga sa buwan sa Hulyo sugdan na og pamintal og bike lanes sa dalan sa V. Rama ug giingong dili kinahanglang mogamit og safety gears apan responsabli sa pagmaneho sa bisekleta. (Carla Jane Calotes, CNU Comm Intern)