SA Agusto na gikatakda nga pagahimuon ang passport on wheels sa dakbayan sa Sugbo base na usab sa anunsiyo ni Department Foreign Affairs (DFA) Secretary Alan Peter Cayetano.
Matod ni Cayetano nga sa duha ka adlaw sa buwan sa Agusto ang schedule sa DFA nga mopahigayon og passport on wheels sa Cebu City subay na usab kini sa hangyo ni Cebu City Mayor Tomas Osmeña sa maong ahensiya.
Sa pagkakaron, wala pa hingpit gibutyag ni Cayetano ang petsa kon kanus-a kini apan duha ka adlaw kini nga mahitabo sa Cebu City.
Marso 27 ning tuiga, dihang nipadala og request letter ang mayor sa DFA aron himuon ang passport on wheels sa siyudad sa Sugbo.
Ang passport on wheels mao kini ang programa sa DFA diin sila na mismo ang mobisita sa usa ka dapit, mas moduol ang pagproseso sa pasaporte sa gusto mokuha og passport.
Dugang ni Cayetano nga plano niya nga magbutang og tagsa ka van sa Luzon, Visayas, ug Mindanao aron mao na kini ang magtuyok sa mga dapit nga layo sa consular office sa DFA aron makaproseso sa ilang pasaporte.
Nasayran nga ang matag van aduna’y lima ka machine ug maka-process kini og 80 ngadto sa 100 ka aplikasyon sa passport matag adlaw.
Mamahimo nga 400 ngadto sa 500 ka passport application ang mahimo nila sa usa ka adlaw.
Gibutyag usab ni Cayetano nga hingpit na nila nga napatuman ang e-payment sa mga consular offices sa DFA aron malikayan kini no-show sa appointment dates.
Dugang ni Cayetano nga mo-average og 20-40% sa nag pa-appoint sa ilang website ang dili motunga sa adlaw nga appointment niini.
Plano usab sa secretarya nga magbutang og mga machine aron mas dali nga maatiman ang mga express lane nga mo-process sa ilang pasaporte aron masiguro nga ma-process sulod sa usa ka oras sa ilang appointment time kadtong mo-process sa ilang pasaporte. (HBL)