SUPERBALITA CEBU

2 patay, 7 sikop sa drug raid

MGA SUSPEK GIPRESENTAR: Ang joint team sa Provincial Intelligence Branch(PIB-CPPO) pinanguluhan sa ilang hepe nga si Chief Insp. Christopher Rey Natnat uban nila ni Sr. Insp. Nazarino Emia, deputy; Sr. Insp. Alejandro Batobalonos, hepe sa Provincial Drugs Enforcement Unit (PDEU-CPPO); mga sakop sa Provincial Mobile Force Company (PMFC), SWAT-CPPO ug Talisay City Police Station ningpresentar sa pito ka mga dinakpan ug mga ebidensiya sa ronda sa Manipis, dakbayan sa Talisay kagahapon. (Alan Tangcawan)

DUHA patay ug pito ang nasikop human gironda sa kapulisan ang ‘shabu drive-thru’ sa Kampo 6, Barangay Manipis, dakbayan sa Talisay kagahapon sa buntag.

Ang namatay human nisukol sa awtoridad mao sila si Rubidel Gabiana, 30, ulitawo, drug pusher ug giingong gun-for-hire ug Jeffrey Himaya, 20, ug igsuon sa usa sa mga nadakpan.

Ang joint team sa Provincial Intelligence Branch (PIB-CPPO) pinanguluhan sa ilang hepe nga si Chief Insp. Christopher Rey Natnat uban sa iyang deputy nga si Sr. Insp.Nazarino Emia, Sr. Insp. Alejandro Batobalonos, hepe sa Provincial Drugs Enforcement Units (PDEU-CPPO), mga sakop sa Provincial Mobile Force Company (PMFC), Special Weapons and Tactics (Swat)-CPPO ug Talisay Police Station.

Lakip sa nasikop ang target sa kapulisan ang mag-live-in nga si Helen Joy Tabilon, 31, naa sa watchlist sa kapulisan high value target (HVT) ug kapuyo nga si Elederio Nadera, 34, on-bail sa kaso sa drugas; Albert Baynos, 33; Gilbert Herbias, 27; Alvin Dacomos, 19; usa ka menor de edad; ug Jane Dacomos, 30, samtang nakaipsot ang iyang kapuyo nga si Gilbert Traya, 40, notadong pusher ug gun-for-hire.

Si Batobalonos nga nahinabi sa Superbalita Cebu nagkanayon nga dugay na nga ilang gi-monitor ang grupo nila ni Helen Joy Tabilon ug Gilbert Traya.

Ang sistema sa ilang pagbaligya sa drugas mao nga mo-drive-thru ang mga kustomer nga magsakyanan gikan sa dakbayan sa Sugbo, dakbayan sa Toledo ug silingang lugar.

“Gituyo nila nga drive-thru para paspas ilang transaksyon ilabi na bukid ang lugar, pero duna gihapon silay suyopanan gitawag gani diri og 'Little Tangke,” dugang ni Batobalonos.

Ang grupo pulos dunay mga tag-as nga armas ug manukol kini hinungdan nga nahitabo ang sinukliay sa bala.

Usa sa napatay nga si Gabiana, kinsa nangilog pa kini'g armas bisan samaran ug namaak sa usa ka sakop sa Swat.

Sumala sa awtoridad, mao kini hinungdan nga ilang gipauwanan og mga bala ang grupo ni Traya ug ang namatay nga si Gabiana.

Apan si Traya, nakasibat bitbit ang tag-as nga kalibre sa armas human nawala sa bakilid nga kalasangan sa maong dapit.

Ang panimalay dunay gibutang sa koral nga koniktado sa live nga linya sa kuryente ug dapit nga didto napatay sila si Gabiana ug kauban duna gihapoy trap nga gibutang botelya sa softdrinks nga sulod gasolina nga gibitay sa kural nga kon dunay modagkot niini nga lighter moulbo.

Sumala ni Batobalonos, gawas sa trap ang panimalay sa mga suspek, daghang mga sekritong exit ingon man sa kalisod sa terrain sa Manipis nakasibat gyud ang ubang mga kauban sa grupo.

Ang nakuha nilang impormasyon magsakay sa motorsiklo ang maghatud og shabu sa nahisgutang lugar.

Gibutyag sa kapulisan nga si Gilbert Traya maoy tuong kamot o sinaligan ni Gerome Labitad, ang usa bangiitang gun-for-hire pusher nga nakaipsot sa operation sa PIB-PDEU CPPO sa Barangay Camp 4, Talisay sa miaging mga buwan.

Si Batobalonos niingon nga ang gidiling drugas nga nakuha nila sa mga suspek mobalor og P270 mil uban sa 5 ka mga armas, daghang mga bala, drug parapernalia, ug halin sa drugas.

Si Helen joy niangkon sa Superbalita Cebu nga namaligya siyag drugas kaniadto apan dihang nadakpan ang iyang kapuyo nga si Nadera, mi-undang na siya.

Si Nadera nibutyag nga human siya nadakpan sa drugas ug on-bail sa yang kaso, niundang na siya ug nisulod sa pagka construction worker.

Matod ni Helen Joy, sa pagkakaron, wala na siya mamaligya kay ang iyang sideline mao nalang ang pakyawon niyag P200 sa paglukot sa mga tin foil para sa pagsuyop.

Apan sa monitoring sa kapulisan nagpadayon gihapon sila sa pagpamaligyag drugas.

Si Kapitan Emma Cabiluna sa Manipis nitug-an nga dugay na nilang problema ang maong dapit ingon man grupo sa mga suspek nga makadaghan na gibadlong nagpadayon sa ilegal. (B)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph