GIHAWOD sa Team Westin ang 15th FDG Badminton Cup elite men’s division niadtong Hunyo 10 didto sa Upper Deck, Julia Vargas, Ortigas City.
Nasilyo sa Westin sa panag-uban sa Kagay-anong sila Jason Uy ug Warren Thomas Treseño ang kampyonato agi pagpilde nila sa pambato sa Tuguegarao City.
Wala tugta nila Uy ug Treseno nga maka-set ang ilang kaatbang agi sa 21-14 ug 21-18 nga daug sa first ug second set.
Pagpaingon nila sa final, nihuman sila nga walay tatsa sa elimination round nga adunay 3-0 win-loss card ug gidaug pa nila ang crossover round aron motungtung sa final.
Gidala nila ang bandera sa dakbayan ug sa Team Shuttle Square, diin nahimutang dinha sa Barangay Gusa.
Nilanding sab ang magulang nga si Jude Uy ug iya kauban nga si Michael Valerio sa ikaduha nga pwesto sa class A division.
Nahuman sab sila Jude ug Valerio nga walay pilde sa elimination round ug sa crossover apan napilde sa final kontra nila Manuel Mendoza ug Adrian Alto agi sa desisyon.
Naka-una sila Jude ug Valerio sa first set agi sa 21-16 nga daug, apan nabaslan sila sa ikaduha sa iskor 14-21 aron mapugos ngadto sa desisyon nga third set.
Apan, wala mapabor kanila diin naangkon nila Mendoza ug Alto ang third set sa iskor 21-16.
“Medyo bagal na among mga tuhod ug ako ra manoy sa team, but we are happy nga niaway mi sa final with Jude,” ingon ni Valerio.