IN FAIRNESS sa mga media outlets, gibalita man nila ang naani ni Presidenti Duterte pagbisita niini didto sa South Korea sa miaging semana.
Apan, ang gisaw-an ug gihisgutan pag-ayo mao kadtong paghalok ni Duterte sa babaye. Diha man gud sa ngabil mitugpa ang pinakurat nga halok sa presidenti.
Ang insidenti sa paghalok nahimong kontrobersiyal dihang gipagawas sab ni PCOO Asec. Mocha Uson ang video ni anhing Benigno Aquino Jr. nga gidumog sab og halok sa duha ka mga babaye didto sa ayroplano. Nisiga ang mata ni Kris Aquino. Wa siya makauyon sa gibuhat ni Mocha.
Ang pundok sa mga kababayen-an Gabriela, sama sa naandan gi-copy-paste lang kanunay ilang baruganan pagkondinar sa lihok sa presidenti. Malisyuso, malaw-ay kuno.
Samtang nagbayloay ug nagtubag ang mga dumadapig ni Duterte ug ang tigsuporta sa mga Aquino, nalingaw pag-ayo ang publiko sa ilang eksena. Nakapangutana ta, nganong ingon niini ang dagan sa panghunahuna sa tawo?
Ang wa maklaro sa publiko nga angay unta idetalyi sa pag-report sa media mao kining P4.9 bilyones nga investment nga nakuha ni Duterte. Momugna kuno kini og kapin sa 50,000 ka mga trabaho sa Filipino.
Maayo kaayo pagkahulagway giunsa paghalok ni Duterte si Bea Kim, ang babaye nga gihagkan apan wala man gani moreklamo. Apan, wala mapasabot sa media unsang klase nga puhonan ang ibubo sa mga Koreano sa Pilipinas ug unsaon sa katawhan pagpahimus niini.
Dako ug utang ang media ngadto sa publiko. Wala nila mahatagi og husay ang katawhan. Pila na ba ka mga biyahi ang gihimo ni Duterte gawas sa nasud. Ug unsa na kadako sa gipangsaad nga investment. Napahimuslan na ba kining investment karon?
Hinuon, dili nato mabasol kon ingon niini ang estelo sa pag-report sa media, labi na kining duha ka higanting media outlet – Philippine Daily Inquirer ug ABS-CBN. Nasayod ta nga mismo si Duterte nipahibaw sa “kahiwian” niining duha ka kompaniya. Makapaabot ba ta og maayong relasiyon tali sa Malacanang ug niining pipila ka mga media outlet?
Bisan unta sa ilang panagbangi, unta mopatigbabaw ang insakto, tiunay, balansi ug matuod nga paghatod sa impormasiyon ngadto sa katawhan. Dili kay lawgan lang ang publiko og balita bahin sa halok.
Unsaon man gud, wa pa gani mauga ang laway ni Duterte ngadto sa ngabil ni Kim, mikuyanap dayon ang balita sa “malisyuso kuno” nga pag-kiss sa presidenti. Pastilan. Unsay gusto ninyo kanang halok ni Hudas?
Maayo nalang nga wala pa kining klase nga media panahon ni Hesus. Kay kon diha pa sila, unya makita nila ang mabudhiong paghalok ni Hudas ngadto kang Hesus, seguradong mapugngan ang paglansang ni Kristo sa krus. Wala untay kaluwasan karon ang katawhan.
Tungod sa kamatayon ni Kristo, kita nga makasasala – apil na kining pipila ka sakop sa media nga gustong mopadangat og taphaw nga balita, kining mga politiko nga mopahimus sa katungdanan – wala na untay kapasayloan karon.
Sayop man o dili ang gibuhat ni Duterte, ngil-ad man o dili ang paggamit ni Mocha sa video ni Aquino, ug makiangayon ba ang reaksiyon ni Kris Aquino, ug labaw sa tanan, na-entertain o wala ba ang publiko sa eskena sa halok, ang importanti mao ang pagpasayloay ug pagsinabtanay. Kinsa man kunoy perfecto o hingpit nga tawo karon?