MALANGAY ang passenger jeepney modernization program sa kagamhanan kay ang mga operator maglisod sa pagpalit og brand new units aron hulipan ang daan nga mga unit.
Ang manufacturer maglisod sa paggama sa gikinahanglanon nga gidaghanon sa mga PUJ unit.
Si Benjamin Ryan Yu, chairman sa Cebu Integrated Transport Service Cooperative (CITRASCO) niingon nga ang Land Transportation Franchising and Regulatory Board (LTFRB) niaprobar na sa pasiunang missionary route, apan way brand new nga mga sakyanan nga ma-operate.
Siya niingon nga ang manufacturer sa sakyanan maka-deliver lang og lima ka units sa duha ka buwan.
Kini nagpasabot nga 75 ka units lang ang ilang magama hangtod sa Disyembre 31, 2020 dihang ang modernisasyon sa mga PUJ moepekto na sa hingpit, sumala sa nalatid sa balaud.
Si Yu niingon nga dunay 11,000 ka units nga pulihanan ubos sa modernization program.
Ang Derpartment of Transportation/ (DOTr) nipatuman sa modernisasyon sa mga jeepney human sa pipila ka tuig nga pagtuon alang sa pagpalambo sa ekonomiya pinaagi sa paspas nga biyahe ug walay daghang moungot sa dalan diin makaapekto sa trapiko.
Dugang pa, ang pagpakunhod sa polyusyon ug pagpalambo sa turismo ug imahen sa nasod.
Apan kini nakasugat og pagsupak gikan sa pipila ka grupo sa sektor sa transportasyon tungod sa kamahal sa bag-ong units. (EOB, RRM)