NAUYONAN sa mga sakop sa Regional Tripartite Wages and Productivity Board (RTWPB) 7 ang paghatag og P20 nga umento sa matag adlaw nga minimum nga suhulan sa mga mamumuo sud sa Metro Cebu atol sa katapusang deliberasyon kagahapon.
Sa mga trabahante nga naa nanarbaho sa mga lugar nga gawas sa Metro Cebu kun mga dapit sa Class B, C ug D, P15 ang ilang madawat nga usbaw matag adlaw.
Samtang P10 ang umento sa mga nanarbaho sa gagmay nga mga kompaniya nga dili molapas sa 10 ang mga trabahante o kadtong gitawag og Micro, Small and Medium Enterprises (MSME).
Ang Metro Cebu gi-classify ubos sa Class A nga naglakip sa mga siyudad sa Sugbo, Carcar, Danao, Lapu-Lapu, Mandaue, Naga, Talisay ug mga lungsod sa Compostela, Consolacion, Cordova, Liloan, Minglanilla, ug San Fernando.
Samtang ang Class B mao ang mga siyudad sa Toledo, Bogo ug ubang mga lungsod sa lalawigan sa Sugbo gawas sa mga isla sa Bantayan ug Camotes.
Ang Class C ang Tagbilaran City ug mga lungsod sa mga lalawigan sa Bohol ug Negros Oriental. Samtang ang Class D ang mga lungsod sa lalawigan sa Siquijor, ug mga lungsod sa mga isla sa Bantayan ug Camotes.
Si Atty. Alvin Villamor, chairman sa RTWPB 7, nibutyag nga nakita nila ang panginahanglanon nga mohatag og umento sa sweldo sa mga minimum wage earner gumikan sa pagsaka sa presyo sa mga palaliton ug serbisyo nga epekto sa Tax Reform for Acceleration and Inclusion (Train) Law.
“Nakita namin ang adversely effect ng Train Law sa mga manggagawa at this time. Parang nabigla ‘yung ekonomiya kay may epekto sa ordinary na mga manggagawa,” pasabot ni Villamor sa pakighinabi sa Superbalita Cebu kagahapon.
Siya nagtuo nga duha ngadto sa tulo ka tuig pa mabatyagan sa mga trabahante ang nindot nga epekto sa Train Law.
Matod ni Villamor nga gikonsiderar nila ang kapasidad sa mga magpapatigayon sa paghatag og umento sa sweldo.
“Kung tayo’y nag-increase ng nag-increase ng ganoon at hindi natin kino-consider ‘yung ano naman employer sector baka naman puro retrenchment o magsasarado ang umabot sa atin. It doesn’t work that way,” pasabot ni Villamor, regional director sa Department of Labor and Employment (Dole) 7.
Si Philip Tan, representante sa employer’s sector sa wage board, niingon kinahanglanon balansehon ang paghatag sa usbaw sa sweldo.
“Much as we would like to have bigger increase pero dili na nato mahatag kay we have also to balance the interest of management. Kondi na sad mabuhi ang mga negosyante, dakodako sad ta og unemployment,” dugang niini.
Human sa deliberasyon kagahapon, sumala ni Villamor nga paninguhaon nila nga maduso sud ning semanaha o sunod semana ngadto sa National Wages and Productivity Commission (NWPC) ang giaprobahan nga umento alang sa komento ug pagtugot.
Kon di kini makasugat og pagsupak, hayan sa Hulyo makapagawas na og bag-ong wage order.
Sa deliberasyon sa miaging semana, si Atty. Ernesto Carreon sa Associated Labor Union-Trade Union Congress of the Philippines (ALU-TUCP), representante sa labor sa wage board, unang nisugyot og P74 nga umento, samtang ang laing labor representative nga si Jose Tomongha, chairperson sa Alliance of Progressive Labor (APL) Central Visayas nisugyot og P75. Apan, P13 lang ang giduso ni Tan.
Hangtod nga nikanaog sa P34. Sumala ni Villamor nga siya na ang nisugyot sa P20 nga giuyonan sa ubang mga miyembro sa RTWPB 7.