MAKASAWAY ta usahay sa pipila ka mga abogado nga mobuhat og mga maniobra aron lang makadaug sa ilang kaso. Nahimo na hinuon silang pasaway imbis nga modelo sa kaligdong.
Karong bag-o lang ang usa ka abogado dinhi sa Davao sa pamilyang Ampatuan nga gikasuhan sa multiple murder sa Maguindanao Massacre namahayag sa media tungod sa di maayong tratamento sa ilang kliyente.
Di daw tinuod nga sad-an ang iyang kliyente kay wa pa mapamatud-i sa hukmanan ug nahimo lang sensational ang maong kaso tungod sa media. Walay special treatment nga nahitabo bisan pa man nga si Andal Ampatuan Sr. nagatulogan sa air-con quarter sa ospital sa Panacan. Dugang pa niya nga nahimong negatibo ang dating sa tawo sa mga Ampatuan kay Muslim kini.
Gisugid niya nga gustong hukman dayon ang kaso sa mga Ampatuan ug gani gihapak pa kini og camera sa usa ka sakop sa media sa Manila kay lagi Muslim siya.
Ngano man daw'ng dili ingon niini ang gidangatan nila ni Erap ug Sen. Lacson nga giakusahan sab sa kaso sa Kuratong Baleleng ug sa Dacer-Curbeto murder?
Tungod kay mga Kristyano sila busa dili pareha sa tratamento sa iyang mga kliyente nga mga Muslim, dugang pa niya. Sad-an daw niining tanang panghitabo mao ang gobyerno ug ang politika sa atong nasud.
Ang gobyerno ang nagpadagko sa ulo sa mga politiko ug warlords busa angayan nga atong mga lider ra usab ang mabasol sa nahitabo sa Maguindanao.
Para kanako daghang sakto sa gibutyag sa maong abogado. Sakto nga dili nato hukman dayon ang mga akusado kay may kaugalingong proseso ang hudikatora.
Gustuhon man natong i-firing squad dayon ang mga Ampatuan apan kung ato kining buhaton nga way tamang proseso, mora'g usa sab kita sa mga mamumuno sa 57 ka ordinaryong sibilyan ug sakop sa media nga gipamatay sa Maguindanao. Wa kitay kalahian kanila nga nikutlo sa kinabuhi nga daw mga hayop lamang.
Sakto sab siya nga dili ilhong special treatment kung nabutang sa ospital o sa kampo sa sundalo ang mga akusado kay gibasi kini sa rekomendasyon sa mga nakahibalo sa ilang kahimtang sama sa mga doktor ug kapulisan.
Gawas pa bisan naakusahan sila, anaa gihapon silay mga katungod ilabi na nga mga opisyal sab sila sa kasamtangang kagamhanan.
Apan foul ang maong abogado sa pag-ingon nga gidaugdaug, gidagmalan ug di maayo ang tratamento sa katawhan sa iyang mga kliyente tungod kay Muslim. Dili kini dapat dal-on nga isyu kay sa tinuod lang may mga Kristiyano usab nga sa CVO, Cafgu ug PNP nga nadahig sa krimen.
Dili sakto nga dal-on sa maong abogado ang pribadong krimen sa iyang kliyente ngadto sa dakong isyu sa Muslim-Christian conflict diin gidaugdaug ang mga Muslim sa mga dayong Kristiyano busa bawion nila pagbalik ug maghimo'g Islamic state sa Mindanao.
Daan na kining maong isyu nga angayang husayon lahi sa kaso nga gikalambigitan sa mga Ampatuan. Unta dili buhatong taktika ug maniobra sa pagpadaug sa kaso ang isyu sa Muslim ug Kristiyano kay bisan unsaon, mga Pilipino ra gihapon kitang tanan.