WALO ka mga pamilya ang apektado sa nahitabong pagdahili sa ilang umahan didto sa Sitio Lapuan, Barangay Lanao, lungsod sa Don Marcelino, Davao del Sur.

Sa nakuhang impormasyon sa Sun. Star Superbalita, nahitabo kini nunot sa kusog nga pagbundak sa uwan niadtong Miyerkules, apan uwahi nang nadawat sa Provincial Disaster Coordinating Council (PDCC) ang insidente.

Si Engineer Roderick Milana, provincial disaster chair, nitug-an sa Superbalita kagahapon, nga naguba ang pananom sa mga mag-uuma human nidahili ang yuta sa bakilid nga bahin sa ilang umahan.

Hinuon, way kinabuhing nakalas o nasamdan atol sa insidente, pag-klaro sa PDCC.

"Dili man hinuon daplin sa dalan ang landslide kay umahan man ni pero nadanyos gyud ang ilang pananom," ni Milana.

Gibantayan karon sa PDCC ang mga lugar diin delikado sa mga pagdahili sa yuta sama sa mga lungsod sa Don Marcelino, Malita, Sta. Maria ug Jose Abad Santos.

Samtang gipahimangnuan sab ang katawhan sa mga lugar nga sagad mahitabo ang kalit nga pagbaha sama sa Bansalan, Hagonoy, Magsaysay, Matanao, Padada, Sulop ug Malalag nga mag-amping.

Matud sa PDCC nga gikinahanglang mag-igmat ang katawhan ilabi na kadtong nanimuyo duol sa sapa sanglit padayong nagdaut ang panahon sukad pa niadtong Lunes.

Matud ni Milana, nga mas maayong sayo ang pagpangandam aron malikay sa disgrasya ang matag usa sanglit di matagna ang dagan sa panahon gumikan sa giingong "Climate Change." (Orlando B. Dinoy)