BALOR og P21 mil nga kantidad sa mga kemikal ang nahanaw human giransak sa wa mailhing mga suspetsado ang bodega sa Sumitomo Fruits Corporation (Sumifro) didto sa Parcela 4, Sumifru Banana Plantation, Barangay Amor Cruz, lungsod sa Laak, Compostela Valley province.
Sa report gikan Laak Municipal Police Station (MPS) nasayran nga pasado alas 6:00 sa buntag niadtong Huwebes, nadiskobrehan sa tool keeper nga si Cleto Rodriguez nga ang iyang gibantayang bodega giransak na sa wa mailhing mga suspetsado.
Sa pagsusi ni Rodriguez iyang nasuta nga ang bungbong nga gama lamang sa kawayan ang giguba sa mga suspetsado aron sila makasulod.
Mga mahalong kemikal sama duha ka litro nga Decis nga kemikal, usa ka kilo nga Actara, usa ka kilo nga Confidor nga kemikal, ug 20 litros nga Beloran nga mikantidad tanan og kapin P21,000.00 ang natangag sa wa mailhing mga suspetsado gikan sa nahisgutang bodega.
Ang hitabo daling gidangop ni Rodriguez ngadto sa buhatan sa kapulisan aron mahimuan og dugang pakisusi.
Samtang mga sakop sa Laak MPS ang mihimo na sab og dugang imbestigasyon sa nahisgutang hitabo.
Gi-eksamen na sab sa mga personahe sa Scene of the Crime Operative ang mga fingerprints nga nakit-an sulod sa nahisgutang bodega aron masayran kung kinsa ang mga responsable sa hitabo.(Marvin Pineda)