ANG buhatan sa Provincial Disaster Coordinating Council (PDCC) sa lalawigan sa Davao del Norte nakaalerto na karon luyo sa sagunson nga mga pag-ulan nga nasinati sa rehiyon onse ug sa probinsiya sa Davao del Norte, aron masiguro ang kaluwasan sa katawhan gikan sa kalamidad.
Sumala pa ni Arlene Semblante PDCC action officer sa Davao del Norte nga andam kanunay ang ilang buhatan aron sa pag-aksiyon ugaling dunay moabot nga kalamidad sama sa mga pagbaha ug pagdahili sa yuta.
"Sa pagkakaron alerto na gayod ang atong buhatan to be sure nga way mga tawo nga maalaot ug mabiktima sa kalamidad," sulti ni Semblante sa pakighinabi kaniya sa Superbalita.
Gisulti sab ni Semblante nga sila mismo karon ang mibisita sa mga lugar nga sagad mabiktima sa mga kalamidad aron sa pagsuta sa kahimtang mga molupyo.
Giila sa PDCC ang mga lungsod sa Carmen, Kapalong, Braulio Dujali, Asuncion, New Corelia, ug Sto. Tomas nga maoy sagad bahaon hilabi na og moawas ang tubig gikan sa Saug river, Pagsabangan river ug Tuganay river.
Ang lungsod sab sa San Isidro maoy giilang dunay mga pagdahili sa yuta nga mahitabo hilabi na og sagunson ang mga pag-ulan.
Apan bisan pa man niini gisulti ni Semblante nga kontrolado pa gihapon nila ang sitwasyon.
Matud ni Semblante nga subay sa nakutlo nilang balita anaa pa sa normal nga level ang tubig sa kasapaan.
"Wala pa usab kita'y ikabahala sanglit manageable pa gihapon nato ang sitwasyon," dugang ni Semblante.
Samtang sa dakbayan sa Tagum, nakaandam na sab ang duha ka rubber boats ug wave runner sa lokal nga kagamhanan alang sa mga pagbaha.
Sumala ni Albert Angco, City Disaster Coordinating Council officer incharge, nga nakaandam na ang ilahang mga himan nga magluwas sa kinabuhi ugaling makasinati og pagbaha ang dakbayan sa Tagum.
Ang lokal nga kagamhanan mituyo gyud sa pagpamalit sa nahisgutang mga himan aron dunay magamit ang siyudad panahon sa kalamidad sa pagluwas sa kinabuhi sa mga molupyo.
Dili buot sa siyudad sa Tagum masusama ang siyudad ngadto sa kauluhan dihang gikuso-kuso kini, gibaha pag-ayo tungod sa bagyong Ondoy nga diin daghang mga molupyo ang wa natabang tungod kuwang sa pagpangandam ug way mga himan nga magamit.(Marvin Pineda)