IHATAG sa Golden State Warriors ang bisan unsa’y gusto ni Kevin Durant aron magpabilin lang kini sa back-to-back champions sa National Basketball Association.
Nagkanayon si Warriors general manager Bob Myers nga sa iyang tan-aw, wala’y kahasol nga masugatan ang ilang pagpirma og balik sa kasamtangang NBA Finals MVP ug hasta kang coach Steve Kerr.
Si Durant puwedeng mopirma og bag-ong upat ka mga tuig nga kontrata sa Warriors nga magbalor og $160 million apan giklaro ni Myers nga andam silang mohatag og mas taas pa nga kontrata.
“I’d love to have him 10 years. He’s earned the right to sign whatever deal he wants,” matod ni Myers.
Si Kerr aduna pa’y usa ka tuig nga nahabiling sa iyang orihinal nga lima ka mga tuig nga kontrata apan andam ang Warriors nga mohatag kaniya og contract extension.
Nagkanayon ang 29 anyos nga si Durant nga plano niyang moretiro sa edad nga 35 nga maoy numero sa iyang jersey.
Ang 9-time All-Star nakakuha na og duha ka mga NBA titles, duha ka Finals MVP awards ug usa ka regular season MVP. (AP, Reuters)