HUMAN sa duha ka mga semana, nagpakita na sa publiko ang gitawag og “The Beast” sa Philippine basketball nga si Calvin Abueva.
Sa miaging gabii, ang pambatong forward sa Alaska Aces nitunga na sa matag Lunes nga ensayo sa Gilas Pilipinas national training pool ug hasta ang naturalized player nga si Andray Blatche.
Si Abueva katapusang nasigpatan sa publiko sa Philippine Basketball Association (PBA) All-Star Week nga nahuman niadtong Mayo 27 ug human niini, kalit lang kining nahanaw nga wala nananghid sa Alaska ug hasta sa Gilas Pilipinas.
Wala kini nagpakita sa mga praktis ug duwa sa Aces gikan sa pagbalik sa mga aksyon sa Commissioner’s Cup gikan sa All-Star break.
Gumikan niini, ang Alaska mipahamtang og indefinite suspension ngadto kang Abueva.
Matod ni Abueva, gidawat niya ang silot sa Alaska ug nakasabot siya niini.
“Yung binigay sa akin (suspension), tanggap ko na naman kung ano yung mangyayari,” matod ni Abueva sa interbyu sa Spin.ph atol sa ensayo sa Gilas Pilipinas.
“Pero dito siyempre ibang usapan ito. Iba rin ang dapat gawin dito.”
Gipasabot ni Abueva nga nagpahungaw lang siya sa iyang personal nga mga problema pinaagi sa pagbakasyon sa Baguio City.
Si Abueva usa sa mga sayo nga ning-abot sa praktis sa Gilas kauban sila si Terrence Romeo, Carl Bryan Cruz, ug Jayson Castro.
Sama sa naandan, bibo lang gihapon si Abueva nga nakig-estorya sa iyang mga kauban nga daw wala kini gisagubang nga problema sa iyang pamilya.
Suspendido man tuod siya sa Alaska apan ang tag-iya sa team nga si Wilfred S. Uytengsu nipabuhagay nang daan nga iya kining tugtan nga moduwa sa Gilas kon ilakip kini national coach Chot Reyes sa final 12.
Ang Gilas nangandam alang sa ikatulong tipik sa FIBA World Cup qualifiers diin ilang ikaharong ang Chinese Taipei karong Hunyo 29 ug Australia Boomers karong Hulyo 2 sa Philippine Arena sa Bocaue, Bulacan.
Gihangop ni Abueva ang oportunidad nga puwede pa siyang makaduwa sa Gilas.
“Allowed naman ako dito e. Siyempre, may responsibilidad ako rito na dapat kong gampanan as a national player,” batbat ni Abueva.
“Tsaka sa personal problem labas dapat ito.”
Gipaneguro ni Abueva nga bisan wala siya nagpraktis sa Alaska ug Gilas sulod sa duha ka mga semana, naa siya sa saktong kondisyon tungod kay nag-ensayo siya sa iyang kaugalingon.
“Nakakahawak naman ako ng bola, nakaka pag shooting din naman,” pasabot sa lumad nga taga Angeles, Pampanga.
“Hindi naman nawawala yung kundisyon ko. Kailangan lang natin ng kaunting (mataas na) level ng kundisyon ng katawan. Kailangan nating i-shape yung katawan natin.”
Sa iyang bahin, nagkanayon si Abueva nga misayo siya pag-abot gumikan kay gusto niyang makuha ang saktong kondisyon alang sa malisod nga mga tahas nga naghuwat sa Gilas.
“I just thought it would be perfect to get in here and be with the guys,” matod ni Blatche.
“I just keep on working and prepare in trying to stop Australia.”
Sa qualifiers, ang Australia maoy bugtong nakapilde sa Gilas, 84-68, sa premiro nilang panagharong niadtong Pebrero sa Melbourne.
Ang mga magduduwa sa Milwaukee Bucks nga sila si Thon Maker ug Matthew Dellavedova sa National Basketball Association (NBA) parehong moduwa sa Australia ning higayuna.
“Australia is an amazing team, a great team,” dugang ni Blatche.
“They’re tall, they’re aggesive, and they’re fast. We’ve got to use our quickness to our adavnatge.” (ESL)