SECTIONS
Monday August 20, 2018
SUPERBALITA DAVAO

Dura: Gawasnon na?

SAMTANG nagkadugay, nagkamingaw ang selebrasyon sa Independence Day sa Pilipinas, kon ikompara sa unang panahon diin makita nato pagkamahinungdanon sa maong selebrasyon.

Kaniadto nako nakita nga kitang mga Pilipino nagtamod sa adlaw sa kagawasan sa nasud gikan sa kamot sa mga Espanyol.

Tingali kaniadto pirmi ko nagsunod sa mga aktibidad sa tunghaan, kaysa karon nga nalinga na ako sa daghang buluhaton mao nga wa na ko nakabantay sa palibot.

Kaniadto kanunay nako madungog ang pulong kagawasan gikan sa mga langyaw nga buot mokontrol kanato.

Tinuod ba gayud nga gawasnon na ang Pilipinas sa kontrol sa mga dagkong nasud?

Kon militante ang pasultihon sa miaging mga administrasyon, di kita gawasnon sa kontrol sa Amerika tungod kay giingon nga tuta sa gamhanang nasud ang mga milabay nga Presidente.

Dihang nahimong Presidente ang atong pinangga nga kanhi Mayor, Rodrigo Duterte, daghan kita nga nakadayeg tungod sa iyang giluwatan nga pahayag kontra sa Amerika.

Tungod niini, nakaingon kita nga gawasnon na tungod kay di magpagawong ang atong Pangulo.

Sa dihang nakig-abin ang atong Pangulo sa China, pipila sa mga kritiko nagsulti nga di kita gawasnon karon sa kontrol sa maong nasud.

Pipila sa ilang sanglitanan mao ang padayon nga pag-ilog sa China sa West Philippine Sea nga klaro nang iya sa Pilipinas subay sa desisyon sa United Nations Convention on the Law of the Sea (UNCLOS).

Gawas niini, ang padayon nga pagpangutang sa gobyerno sa China nga gigasto alang sa Build, Build, Build Program.

Dunay rason ang gobyerno nganong nakig-abin kini sa China, kini tungod kay di buot ang Pangulo nga mahulog sa alaut ang mga Pinoy kon makiggubat kita sa China.

Sa pikas bahin, duna say rason ang mga kritiko tungod kay dayag man nga nakigsuod kita sa China nga posibleng mokontrol kanato sa umaabot nga panahon.

Apan ang pagpakighigala sa mga dagkong nasud, alang nako, di dautan tungod kay sa matag peligro, dunay oportunidad basta huna-hunaon lang sa gobyerno nga di kita malubong sa utang, magawngan sa maong nasud.


VIEW COMMENTS