GENERALSALIPADA K.PINDATUN, Maguindanao -- Misaka na sa 17 ang patay sa mga terorista samtang usa sa militar sa nagpadayon nga air to ground assault sa Liguasan Delta sa probinsiya.
Giila ang napatay nga sundalo nga si Private First Class (PFC) Garry Quitor, taga Pigcawayan, North Cotabato, ug nadestino sa 33rd Infantry Battalion sa Philippine Army.
Miabot na sab sa 17 ka mga miyembro sa Bangsamoro Islamic Freedom Fighters (Biff) ang napatay sa gilusad nga law enforcement operation sa Joint Task Force Central sa militar nga gipangulohan ni 6th ID Chief Brigadier General Cirilito Sobejana.
Kahinumdoman nga gibombahan sa Tactical Squadron sa Philippine Air Force gamit ang duha ka Agusta Helicopter Gunship ug mga kanyon gikan sa 7th Field Artillery Battalion Philippine Army ang himuan og bomba sa Daesh o Isis-inspired group nga Biff sa utlanan sa Maguindanao ug North Cotabato.
Resulta sab kini sa pagkalit-ag sa magtiayon nga bomb experts sa Biff ug pagkarekober sa mga improvised explosive devices (IEDs) lakip na ang mga tag-as nga matang sa armas.
Misaka na sab sa napulo ka libo nga mga molupyo sa Maguindanao ug North Cotabato ang mihiklin sa kahadlok nga maipit sa kagubot.
Sa kasamtangan, nagpadayon ang paggukod sa Joint Task Force Central sa grupo ni Kumander Abu Wahid sa Daesh Terrorist Group, Shiek Esmail Abdulmalik, alyas Kumander Abu Toraifie nga Emir sa biff-Isis inspired group uban ang mga langyaw nga terorista sa Liguasan Delta. (Edgar Fuerzas)