SECTIONS
Monday August 20, 2018
SUPERBALITA CAGAYAN DE ORO

Amahan hubo na nga napalgan

WALA’Y sapot nga napalgan ang usa ka amahan nga nag-lutaw-lutaw sa suba ug naila kini sa pamilya pinaagi sa gisul-ob nga relo mga alas 8 sa buntag Miyerkules, Hunyo 13, sa may riverside, Balulang, dakbayan sa Cagayan de Oro.

Giila sa pamilya ang biktima nga si Rosito Junayon, 58, minyo ug residente sa Biasong, Barangay Macasandig.

Sa impormasiyon nga nahipos, gikabutyag nga niadtong adlaw nga Dominggo, Hunyo 10, wala na makauli sa panimalay ang biktima hangtod nga napalgan na lamang kini nga wala na’y kinabuhi.

Giingong nakasinati ang biktima og depresiyon human matud kini natangtang sa iyang trabaho.

Sa pakighinabi sa SuperBalita ngadto na kay Senior Police Officer (SPO) 4 Fernando Laspoña, imbestigador sa Police Station 4 (PS4) sa Carmen, nga wala’y nakitang foul play sa kamatayon niini.

“Wala’y foul play, posibleng nalumos siguro, wala naman siya’y sinina” pahayag ni SPO4 Laspoña.

Samtang sa inisyal nga imbestigasiyon gikan sa Scene of the Crime Operatives pinaagi na usab ni Dr. Christian Caballes, gikompirma usab niini nga wala’y nakitang foul play sa kamatayon sa namatay nga biktima.

“Sa initial assessment po natin wala naman pong saksak, tama ng bala or bugbog ho yung namatay, yun pong dugo na nakita po natin sa kanya gawa po yun ng mga kagat po nang isda sa tainga niya, sa mata at saka sa mga labi, wala rin pong marka na baka ginapos yung kamay nya or yung paa niya” pahayag ni Caballes.

Giingong ang nakitang mga samad sa dagway pinaakan kini sa mga isda human posibleng gipaak-paak samtang nag-utaw utaw sa tubig sulod sa pipila ka mga adlaw.

Sa pagsulat niini nga balita, ang patay nga lawas ang anaa na sa Bollozos Funeral Homes sa Bulua ug gi-atiman na sa nahabiling pamilya.


VIEW COMMENTS