SECTIONS
Monday August 20, 2018
SUPERBALITA DAVAO

Gatusan gi-random drug testing

MATANAO, Davao del Sur -- Gipailawom sa random drug testing ang gatusan ka mga drug surenderers sa 33 ka mga barangay sa lugar niadtong Martes, Hunyo 12.

Ang aktibidades gipaluyuhan sa lokal nga gobyerno, Philippine Drug Enforcement Agency, Department of Interior and Local Government (DILG), ug buhatan sa kapulisan.

Sumala ni Raymond Olivo, DILG officer sa lugar, nga una nang gipailawom sa rehabilitation program ang mga mitahan kaniadto mao nga gitakdang mo-gradwar kini sa rehabilitation course karong Hunyo 21.

Giklaro ni Olivo nga ang pagpailawom sa drug test usa ka paagi aron masegurong wa na mobalik sa pagamit og ginadiling druga ang mga surendeerees.

Dako sab ang pasalamat ni Olivo kang Mayor Vincent Fernandez kinsa maoy mihatag og badyet aron mapatuman nila ang hugot nga kampanya batok sa pagamit og illegal nga druga.

Samtang, si Senior Inspector Renato Uy, hepe sa kapulisan, nagbutyag nga humana nadeklara ang 33 ka mga barangay nga drug free mao nga gipaningkamotan nila nga di na makasulod sa ilang lugar ang illegal nga druga.

Gitataw niini nga wa nay mga tigpayuhot og druga sa ilang lugar mao nga dali na lang nilang masakpan kun adunay modayo nga druga sa ilang lugar.

Si Uy nagbutyag nga dako og gikatabang sa ilang kampanya ang mga sakop sa Barangay Drug Abuse Council diin mas aktibo sa kasamtangan.

Apil sab nga mitabang sa kampanya ang mga pastor sa nagkadaiyang relihiyon hinungdan nga epektibo ang ilang kampanya. (Orlando B. Dinoy)


VIEW COMMENTS