MOHATAG og P100 mil isip ganti ang lokal nga kagamhanan sa Panabo City kung kinsay makatudlo sa mipusil-patay sa publisher sa Trends and Times nga mantalaan sa Panabo City nga si Dennis Denora.
Kini ang gibutyag ni Panabo City Police Station commander Superintendent Rimas Lambert human gitukod niadtong adlaw'ng Lunes, Hunyo 11, ang Task Force Denora.
Sa TF-Denora nahimong head sa imbestigasyon mao ang City Prosecutor’s Office sa Davao del Norte, National Bureau of Investigation (NBI) 11, Armed Forces of the Philippines (AFP) ug ang kapulisan sa rehiyon.
Sumala ni Davao del Norte provincial director Senior Superintendent Allan Manibog nga duna na silay lima ka mga person of interests diin ang lima giingong nakita duol kang Denora samtang nagtan-aw kini og basketball una kini gipusil sa Barangay New Pandan, Panabo City, Hunyo 7.
Ginasubay pa sab sa kapulisan sa Davao del Norte ug sa TF-Denora ang mga impormasyon nga ilang nadawat sa ilang hotline aron masuta kung tinuod ang mga info nga ginapaabot labot sa hitabo.
Ginaawhag sab sa kapulisan sa Davao del Norte ang mga miyembro sa media sa dapit nga mosumbong dayon kanila kung makadawat sila og bahad sa kinabuhi.
Sa kasamtangan ginahulat pa sa kapulisan ang forensic results sa kamatayon ni Denora alang sa pagpadayon sa mas lawom nga imbestigasyon sa hitabo. (Jeepy P. Compio)