SA ikaduhang sunodsunod nga katuigan, mabagang hut-ong sa mga sumosunod sa Golden State Warriors ang ningsalmot sa parada sa kalampusan kagahapon sa downtown Oakland, California agi’g pagsaulog sa back-to-back nga naangkong kampiyunato sa Warriors sa National Basketball Association (NBA).
Ming-ugyaw ang mga sumosunod sa Warriors dihang ningkanaog ang ubang mga magduduwa gikan sa gisakyan niining double-decker bus aron makighugoyhugoy sa mabagang hut-ong sa mga tawo nga nagpasad kadalanan.
Ang mga sumosunod sa Warriors nanagsul-ob sa gold ug blue T-shirts ug nagwarawara og placards nga adunay nakasuwat nga “Dynasty” ug “Back to Back Champions.”
Sila si Stephen Curry, Finals MVP Kevin Durant, Klay Thompson, Draymond Green ug uban pang mga sakop sa Warriors nagpulipuli sa pag-isa sa Larry O’Brien Trophy alang nagsadya nga katawhan nga gibanabanang moabot og usa ka milyon, matod sa mga nag-organisar.
Ang mga nag-organisaar misaad nga hatagan ang mga sumosunod sa Warriors og kahigayunan nga makapangutana sa mga magduduwa sa team ug makita kini sa higanteng TV screens.
Apan gumikan kay wala may higanteng TV screens nga naplastar, si Thompson migamit og megaphone sa pagsulti’g ‘hello’ ug ning higayuna, minglanog dayon ang abiba.
Si Curry miabli og botelya sa champagne, iya kining giuyog-uyog dayon gipasiritan ang mga nagsadya nga mga sumosunod. Mikanaog sab si Curry sa bus aron molabay itsa og mga T-shirts, bracelets ug uban pang souvenir items ngadto sa mga tawo.
“We never really imagined that we would be having one parade, let alone two and now three,” matod ni Curry sa interbyu sa wala pa nagsugod ang parada.
“But this is for you guys! We are going to try and get greedy and go get some more.”
Ang Warriors ningsakmit sa ilang ikatulong titulo sa miaging upat ka mga tuig.
Sila si JaVale McGee, Nick Young ug Jordan Bell nagpakuha og hulagway kauban sa mga sumosunod sa Warriors ug hasta si coach Steve Kerr mipirma sab og autographs.
“I’m just excited to be here with these guys,” matod ni McGee. “Our fans are amazing! All the love that they show is just beautiful.”
Ang usa ka fan nga si Jasmine Culp, 36, kinsa lumad nga taga Oakland, nagkanayon nga gipahimuslan kining higayuna sa iyang pamilya tungod kay mao na kini posibleng katapusang moparada ang champion Warriors sa ilang dakbayan.
Sa sunod tuig, ang Warriors mobalhin na og homecourt nga nahimutang sa San Francisco nga dili ra layo sa Oakland.
“It’s sad to see a big part of our city move away,” asoy ni Culp. “Not going to want to travel over the bridge to see them, but we will.”
Mao sab kini ang gitagawtaw ni Melissa Marzan, 25, sa Santa Cruz.
“We all know it’s not going to happen forever, so for now we’re just going to enjoy it,” matod niya.
Sa miaging NBA Finals, gisiruhan sa Warriors si LeBron James ug ang Cleveland Cavaliers sa best-of-seven series, 4-0. (AP, ESL)