USA ka solo parent ang nagutana kanato bahin sa pagsuporta sa iyang anak. Ang balaod sa support makita sa Article 194-208, Family Code of the Philippines. Ang support naglakip sa pagkaon, kapuy-an, sinina, medikal nga pagtagad, edukasyon ug transportasyon.
Kinsa man ang obligado sa pagsuporta sa usag-usa? Ubos sa Art. 195, Family Code, naglakip kini sa magtiayon, lehitimo nga ginikanan ug mga anak, apo ug apohan, mga lehitimo ug di lehitimo nga mga anak, mga ginikanan sa di lehitimo nga mga anak ug ang ilang mga lehitimo nga mga anak ug mga managsuon, lehitimo o di.
Ang mga ginikanan, minyo o di, kinahanglan nga parehong mosuportar sa ilang anak (joint support), basi sa ilang kabtangan ug kinitaan ug sa panginahanglan sa bata. Apan ang usa ka solo mother, kinahanglan una nga moprobar nga ang iyang anak, anak usab sa giingong amahan nga iyang gipangayoan og suporta.
Kon ang giingong amahan mohimakak o di moila sa bata, way laing kapaingnan kon di ang pagpasaka sa inahan og petition for compulsory recognition of an illegitimate child sa hukmanan. Kon maprobahan nga ang sinumbong maoy amahan sa anak, mandoan siya sa hukmanan sa pag-ila sa bata nga iyang anak.
Kon maestablisar na nga ang sinumbong maoy amahan sa bata, ang inahan mahimo nang makademanda og suporta alang sa maong bata. Kon di maprobahan ang relasyon sa amahan ug anak, di makapangayog suporta ang inahan gikan sa giingon nga amahan. (Francisco vs. Zandueta, 61 Phil. 752)
Ang deklarasyon sa status sa bata nga maoy basihanan sa suporta mahimo nga temporaryo o pinaagi lang sa mga pinanumpaang pamahayag. (Mangulabnan vs. IAC, 185 SCRA 760). Apan kon way pruweba sa relasyon sa mahan ug anak, di ikahatag sa korte ang gipangayo nga suporta.
Sa dihang naprobahan na nga ang sinumbong maoy amahan, ang inahan kinahanglan nga mohimo sa usa ka written demand for support nga dunay pruweba nga nadawat kini sa amahan. Kon modumili ang amahan sa paghatag og suporta bisan pa kon nadawat niya ang writeen demand, mahimo na siyang mopasaka og petisyon alang sa child support.
Ang Republic Act No. 9262, ang “Anti-Violence Against Women and their Children Act of 2004” nagsilot niadtong mga ginikanan nga magdumili sa pagsuporta sa ilang mga anak.
(edbarrita@gmail.com)