Ngano nga nagnihit ang bakuna sa rabies

GIPASABOT ni Department of Health (DOH) 7 Regional Director Jaime Bernadas nga ang preparasyon sa brand sa Anti-Rabies Vaccines (ARVs) nga Rabipur ang rason kon nganong gi-hold una sa DOH Office ang pagpalit niini nga mga bakuna.

Gibutyag ni Bernadas sa Superbalita Cebu kagahapon nga aduna’y impurities nga nakita sa preparasyon sa maong bakuna, apan niklaro kini nga wala ra kini problema.

Tungod niini, wala’y supply sa ARVs ang DOH apan nipagawas kini og guidelines karon nga mamahimo rang mogamit ang publiko hilabi na ang Animal Bite Treatment Centers sa laing ARVs sa merkado nga Verorab diin usa usab kini ka prequalified vaccine sa World Health Organization, butyag pa ni Bernadas.

Subay niini ang Office of the Technical Servies nipahibaw sa mga health facilities, Animal Bite Treatment Centers, Local Government Units ug sa publiko nga mamahimo ra mopalit sa dili WHO prequalified vaccines karon nga dili pa available ang WHO prequalified vaccines, basta aprobado kini sa Food and Drug Administration (FDA).

“Nagpagawas og guidelines ang main office nga kadtong naay FDA nga approval/license to operate nga mga bakuna, active bakuna for Anti-Rabies mao una arong gamiton,” dugang ni Bernadas.

Wala pa mahibawo si Bernadas kanus-a maabot ang ilang gi-order nga laing bakuna alang sa ARVs aron mapang-apud-apod sa mga Animal Bite Treatment Centers.

Dugang pasabot niini nga duha ka klase ang bakuna kon mapaakan og iro, usa niini mao ang ARVs nga usa ka active immunization samtang ang Rabies Immunoglobulins (RIgs) nga usa ka passive immunization.

Sa pagkakaron giawhag sa maong ahensiya ang Responsible Pet Ownership diin ang tag-iya una sa mga iro mao ang moabag sa pagpalit sa ARVs .

Niadto lang 2017 dihang aduna’y kompirmadpng 21 ang natala sa DOH nga human rabies.

Ang Cebu City bag-o ra usab nilusad sa pagpamakuna sa mga iro ug iring sa kabarangyan. (HBL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph