SECTIONS
Saturday August 18, 2018
SUPERBALITA CEBU

MOA sa 93-1 dunay problema; ordinansa ang babag: Osmeña

NAKASUGAT og problema ang landswap deal tali sa Cebu City Government ug Kapitolyo ilawom sa 93-1 ordinance.

Kini ang gibutyag ni Mayor Tomas Osmeña human gikwestyon ni Konsehal Joel Garganera ang kalangan sa transaksyon human ilang gihatagan og gahom ang mayor nga makapirma sa memorandum of agreement tali kang Gobernador Hilario Davide III.

Ang mayor nitug-an nga ang ordinansa sa South Road Properties (SRP) maoy nakaingon sa pagkadelatar sa transaksyon sanglit nalatid nga mahimong mabaligya ang luna sa SRP pinaagi sa ordinansa.

Ang Cebu City Government nitanyag og mga yuta ngadto sa Kapitolyo baylo sa mga luna ilawom sa 93-1 sama sa block 27 ug kasikbit nga yuta sa North Reclamation Area, City Zoo, relocation site sa Consolacion ug duha ka ektarya sa SRP.

Sa paghatag og gahom sa Konseho ngadto ni Osmeña nga makasulod og kasabutan gipaagi sa resolution hinungdan nga adunay technical problem nga ilang nasugatan.

Apan ang mayor niingon nga iya kining sulbaron sanglit makabenepisyo niini ang libuan ka mga tawo nga molupyo sa siyudad.

Gitug-an ni Osmeña nga di pa siya sigurado nga masulbad ang maong problema (technical) sanglit wala pa ang hustong panahon hinungdan nga iyang gipursige ang iyang mga kaalyado sa konseho.

Gipadayag usab sa mayor nga kon adunay kausaban sa liderato sa Kapitolyo hilabi na nga nagkaduol ang eleksyon sa 2019, hayan babagan sa mosunod nga gobernador ang lakang nga ilang nasugdan.

Apan nagtuo si Osmeña nga buligan gihapon sa katawhan si Davide aron makapadayon sa iyang mga programa ug proyekto para sa lalawigan.

Ang pagkasulbad sa suliran sa 93-1 usa sa kampanya ni Osmeña sa pagpapili niya pagkamayor. (PAC)


VIEW COMMENTS