SECTIONS
Saturday August 18, 2018
SUPERBALITA CEBU

Mga menor nga gipriso gipasagdan?

HUGAW sa tawo gisulod sa plastic bag ug gipang-ulod na samtang gipangbitay sa detention cell sa mga menor sa Department of Social Welfare and Services (DSWS) sa lungsod sa Minglanilla.

Ang mga ginikanan sa lima ka menor de edad ningdangop sa dySS Super Radyo ug Superbalita Cebu ningreklamo kabahin sa kahugaw ingon man pagpabaya sa tagdumala niini nga makadaot sab sa kahimtang sa mga nabilanggo.

Si Ginang Nabor, taga Brgy.Tubod, Minglanilla, usa sa mga gininakanan sa menor de edad, nibutyag nga di makatawhanon ang pagpadagan sa mga taga DSWS Minganilla sa detention cell.

Ang iyang anak nga menor de edad uban sa laing upat nasakit na gumikan sa kabaho ug kahugaw sa detention cell.

Duha ka semana na makausa lang makakaligo ang mga bata.

Ang gisakitan nila og maayo mao nga way pansayan ang detention cell ug anha ra sila mopagawas sa hugaw sulod sa selda ug isulod lang sa plastic bag.

“Inhuman kaayo ilang pagtratar sa mga bata, Sir! Gitagaan lang nilag plastic bag aron maoy sudlan sa ilang hugaw,” dugang ni Ginang Nabor.

Baho

Sumala pa niya nga di masingo ang kabaho ug kahugaw sanglit gipang-ulod na ang mga hugaw nga gisulod sa plastic nga gipangbitay.

Gihulagway niya nga daw dayan-dayan sa Christmas tree namungingi ang plastic bag.

Mireklamo na sila niini apan wa sila hatagi og pagtagad sa mga personnel sa DSWS.

Si Anecita Rodriguez, chief sa DSWS sa Minglanilla, nangayo og despensa gumikan sa di maayong pasilidad.

Gipadayag niya nga temporaryo lang sila gipa-ukupar sa ikaduhang andana sa karaang merkado sanglit wa pa silay pasilidad.

Karong sunod bulan, ilang ilbalhin ang pasilidad sa police station kay ibalhin na usab kini sa laing lugar.

Gipadayag niini nga wa silay tubig sanglit mangayo lang silag supply gikan sa ubos sa edipisyo nga gidumala sa bombero.

Ang kabahin sa pansayan, pagamiton lang nila sa laing pansayan ang mga bata.

Hinuon ilang gipalimpiyuhan gilayon kagahapong adlawa human nadawat ang impormasyon gikan sa media.

Apan si Ginang Nabor hugtanong mipadayag nga 2 ka semana na nga na detained iyang anak uban sa laing menor de edad, wa mahitabo nga gipagamit silag pansayan.

Gipadayag niini nga gi-itsahan lang sa mga personnel sa DSWS og plastic bag ang mga bata uban sa katawa.


VIEW COMMENTS