SECTIONS
Saturday August 18, 2018
SUPERBALITA CEBU

Demolition sa Lapu gisugdan

Gisugdan. Mga sakop sa demolition team sa Dakbayan sa Lapu-Lapu nagsugod na sa pagpangguba sa labing minos 600 ka mga balay sa kabaybayunan sa siyudad nga nakalapas sa three-meter easement. Si Mayor Paz Radaza ang mimando na niini. (Allan Cuizon)

KAPIN sa 600 ka balay paabangan ug 60 ka alad sa baboy sa Barangay Ibo, Lapu-Lapu nga milapas sa 3-meter easement gikan sa baybayon ang gisugdan na og pagpangguba kagahapong adlawa.

Malinawon ug way apektadong residente ang suway nga mibabag sa 250 ka mga sakop sa demolition team gikan sa buhatan sa City Engineering, Clean and Green ug Material Recovery Facility.

Sa sayo pa, ang buhatan sa City Attorney una nang mipadala og notisya sa mga nanag-iya og balay paabangan ug baboyan nga nagpahibawo sa demolisyon ilabi na niadtong estruktura nga gitarok sa dagat.

Naaghat ang Siyudad sa maong lakang human niadtong gipagawas nga resulta sa water sampling sa Department of Environment and Natural Resources (DENR) - Environmental Management Bureau (EMB) diin nasuta nga adunay presinsiya sa fecal bacteria ang kadagatan sa Mactan.

Usa sa gikabalak-an ni Mayor Paz Radaza nga mahisama unya sa Boracay Island ang Lapu-Lapu nga gipasirhan tungod sa high level sa maong bacteria nga gikan sa hugaw sa tawo.

Ang economic driver sa Lapu-Lapu mao ang turismo gumikan sa beach resorts ug buot ni Radaza mapanalipdan ang kadagatan.

3,000 apektado

Gipahibawo sa mayor nga human mahawanan sa informal settlers ang baybayon sa Barangay Ibo, isunod ang Barangay Pusok.

Napadad-an na sab og notisya ang mga nanimuyo daplin sa dagat sa Barangay Pajo, Buaya ug Mactan.

Gibana-banang moabot sa kinatibuk-ang 3,000 ka informal settlers ang ma-apektuhan sa lima ka mga coastal barangays.

Gipahinumduman ni Radaza ang mga barangay kapitan nga pahugtan ang pag-monitor niadtong mga lumolopyo ilabi na niadtong nagtinguha nga mobalik og tukod og balay daplin sa baybayon.

DENR midayeg

Gidayeg sa Department of Environment and Natural Resources (DENR) 7 ang gihimo sa kagamhanan sa dakbayan sa Lapu-Lapu sa pagtangtang sa mga illegal structures sulod sa 3-meter easement zone sa coastal areas.

Matod ni DENR 7 Regional Director Gilbert Gonzales nga ang local government units (LGUs) ang mohimo sa inisyatibo ug sila sa DENR, andam motabang.

“Yeah, I think the initiative should come from the LGU. , what we can do in DENR is to provide them the right data information to confirm kung saan yung boundaries, so that they can act appropriately,” si Gonzales nagkanayon.

Gibutyag usab niini nga sa wa pa ang lakang sa Lapu-Lapu City Government, nakigtagbo kini kanila aron masuta ang mga boundaries ingon man aron maisyuhan og notices ang mga illegal structures.

Tungod kay urban city ang Lapu-Lapu 3-meter lang ang easement zone niini base sa Water Code of the Philippines.

Nibutyag usab si Environmental Management Bureau (EMB) 7 Regional Director William Cuñado nga niabot sa 626 ka notice of violations ang naisyu nila karon lang tuiga.

Kasagaran niini mao ang mga dapit nga anaa sa coastal areas lakip na ang mga establisymento nga naa sa baybayon o beach resorts.


VIEW COMMENTS