Mga duwa karon
1:00 pm- UV batok UC (jrs)
2:30 pm- USC batok USJ-R (jrs)
4:00 pm- UV batok USPF (srs)
5:30 pm- USJ-R batok USC (srs)
IPARADA na karong hapon sa University of the Visayas (UV) Green Lancers ang bag-o nilang Fil-Ams nga mga magduduwa sa ilang pagpakig-batok sa University of Southern Philippines Foundation (USPF) Panthers sa pagsugod sa Cesafi-santioned 2010 Partner’s Cup sa Cebu Coliseum.
Gipangtumbok mao sila si 6’6” Andrew Avillanosa ug 6’4” Rene Saycon, nga pulos giingong adunay saktong abilidad sa ilawom nga bahin,
Si Avillanosa karon pa lang gyud tuiga naabot sa kampo sa Cesafi 9-time champion samtang si Saycon sa miagi pang tuig miabot apan wala pa nakaduwa sa Cesafi gumikan sa problema sa akademya.
Ang duha igo na kaayo aron matapakan ang puwesto ni 7-footer Fil-Am Greg Slaughter, kinsa giingong dili na mobalik sa Green Lancers aron makatutok sa iyang pagduwa sa Smart Gilas RP Team.
Gipasabot ni Green Lancers coach Elmer Cabahug nga dili niya paduwaon ning maong torneyo ang iyang mga beterano aron hatagan og kahigayunan ang iyang mga bag-o sa pagmatuod sa ilang kaugalingon.
“This a good exposure para sa atong mga bag-o para ma-ready na sila sa Cesafi,” asoy ni Cabahug.
Ang Green Lancers usa sa duha lang ka teams nga gidid-an pagkuha ang imports. Ang laing usa mao ang University of Cebu (UC) Webmasters.
Ang ubang partisipanteng teams gitugtan nga makakuha og imports apan gikinahanglan nga produkto gyud sa ilang tunghaan ang ilang kuhaon.
Sa main game, magsangka ang University of San Jose Recoletos (USJ-R) Jaguars ug University of San Carlos (USC) Warriors.
Sa high school division, mag-abot ang UV Baby Green Lancers batok UC Baby Webmasters sa premirong duwa unya sundan kini sa engkuwentro sa USC Baby Warriors ug USJ-R Baby Jaguars.