MANILA - PAKYAS si Brian Viloria sa pagdepensa sa iyang International Boxing Federation (IBF) lightflyweight title human kini masugamak sa masakit nga kapildihan sa mga kamot sa Colombian nga si Carlos Tamara pinaagi sa technical knockout decision sa ika-12 nga round sa ilang “Collision Course” Boxing at the Bay sa Cuneta Astrodome.
Subo nga palandungon ang maong kapildihan sanglit human sa away, si Viloria kinsa naglaraw nga magminyo karong tuiga, nawad-an sa panimuot sa paghiabot niini sa dugout ug gidala gilayon sa Makati Medical Center.
Hangtod ning pagsulat, padayon pang giatiman sa mga manambal ang 29 anyos nga Fil-Am.
Sa unang pito ka mga round, daw yanong kadaugan ni Viloria ang naaninaw sa iyang dumadapig gumikan sa iyang saktong dominasyon.
Ang kombinasyon sa wala ug tuo nga kumo ni Viloria sa makadaghang higayon mipa-groggy sa Colombian nga Tamara.
Sa ikaupat nga round, nitikuko si Tamara human kini maigo sa usa ka uppercut ni Viloria. Gikan niadto hangtod sa ikaunom nga round, ang tiyan na maoy gisigihan og ataki ni Viloria nga daw sa nakapaluya sa bisitagng taga Colombia.
Apan sa pagsugod sa ikawalo nga round, nausab ang dagan sa away, ug ning higayuna, si Viloria na ang nagsigi og kabangog.
Mga siyagit ug pag-abiba sa mga dumadapigmao na lay naghatag og gamayng kadasig ni Viloria. Sa ika-12 ug katapusang hugna, tungod sa grabi nang kaluya, kaduha gyud masukamod si Viloria sa dihang nasaylo ang iyang walop.
Ug sa nahabiling 1:45 segundos sa maong round, gidabodabohan og maayo ni Tamara si Viloria kinsa nagbarog na lang nga wa gyud manumbag pa.
Wa mag-usik ug panahom, giundang gilayon ni referee Bruce McTavish ang away pabor sa bag-ong IBF light flyweight champion.
Sa onse ka round, sikit kaayo ang scores sa judges nga posibli pa untang matabla kon nakatiwas pa sa ika 12 nga round si Viloria.
Usa sa mga judge mitali og 104-105, pabor kang Tamara samtang laing judge ang mitali og 105-104 alang kang Viloria. Ang ikatulong judge adunay score nga 106-103.
Sa co-main event nga away, ang WBO mini flyweight champion nga si Donnie Nietes mikulit og TKO nga kadaugan sa ika-9 nga round batok ni Jesus Silvestre sa ilang non-title fight.
Sukwahi sa gituohan, niagi usab og saktong kombati si Silvestre ug mipa-groggy usab ni Nietes sa ikawalo nga round.
Sa ikanapulo nga round, human maigo sa solidong right straight ni Nietes, giluwa ni Silvestre ang iyang mouth piece ug mipaingon sa iyang corner ug niinum og tubig, hinungdan nga giundang sa referee sa katapusang 1:37 segundos sa maong round.
“Lisod sab gid, may kusog sad. Abi nako tapos na sa first round, pero nakabarog pa man,” matod ni Nietes human sa away.
Gisugat usab og maanindot nga kadaugan ang pagbalik ni Jimrex Jaca human niya tumbaha ang lig-on ug kusog usab nga si Ramahdan Weriu sa Indonesia.
Ang upper cut nga gisundan og solid straight maoy nakapakamang ni Weriu sa kanbas sa ikalima nga round ug wala na kini mobangon pa hangtod napupos ang pag-ihap sa referee.
“This is a good break for him (Jaca). It’s an impressive comeback,” matod ni Antonio L. Aldeguer sa ALA Boxing Club kinsa mao na karon ang naggiya kang Jaca.
Midaog usab ang laing Ala Boy nga si Jason Pagara pinaagi sa majority decision. Duha ka judges mitali og 98-92, 98-94, pabor kang Pagara samtang tabla ang sa ikatulong judge, 95-95.