SECTIONS
Saturday August 18, 2018
SUPERBALITA CEBU

Rabacal: White Gold Club

ANG una ug labing dakung superstore dinhi sa Visayas, White Gold - nagsugod sa usa ka gamay nga variety store nga gipundar dinhi sa Cebu City ni Doña Modesta Gaisano.

Pormal kining miabli alang sa mga Sugbuanon sa dalan Juan Luna (karon Osmeña Boulevard) niadtong 1946. Sa 1950 narehisro kini sa Securities and Exchange Commission (SEC) isip White Gold, Inc. Gidumala kini sa mga anak ni Doña Modesta nga sila si David (kina-maguwangan), Stephen, Henry, Victor ug John.

Ang White Gold sa Juan Luna St. nasunog niadtong Oktubre 28, 1974. Gitukod kini pagbalik sa David Gaisano St., North Reclamation Area atubangan sa usa usab ka inilang restaurant nga gipanag-iya sa pamilya ang White Gold House niadtong last quarter sa tuig 1979. Nasunog kini niadtong November 29, 1989 apan dali kining naka-abli pagbalik. Apan sa pagkasunog niini og balik, wa na kini makabarug pagbalik sa ilang naandan nga lugar.

Human niini mituyhakaw ang himalitan kaayong White Gold Club nga anaa karon mahimutang sa A. Soriano St., North Reclamation Area niadtong December 1997. Gidumala kini sa kina-maguwangang anak ni David nga si Joseph Gaisano. Daghang tawo ang ganahan mangumpra sa White Gold Club tungod sa kumpleto ug baratong palaliton. Sayon ug hamugaway pa kaayo ang parking area.

Anaa kini mga kan-anan diin imong mapalit ang lamiang Filipino food ug coffee shop alang sa mga customers. Anaa usab kanunay ang native delicacies. Gibantayan kini nila ni Rose, Bea, Creamy ug Jolibee uban kang Aleen.

Ang White Gold Café maoy nahimong rendezvous sa mga nagtawag sa ilang pundok og “The Golden Boys” (sa ato pa karaang mga tawo sa White Gold) gipanguluhan ni kanhi Labor Commissioner Atty. Amor Cañete uban sa labing “batan-on” nga si kanhi Dumanjug Mayor Tomas Garcia, 91 anyos. Anaa usab sila si kanhi Cebu City Mayor Alvin Garcia, kanhi Carcar Councilor Boy Sato, General (retired) Atty. Fritz Quiñanola, businessman Lao Rogero, retired Immigration Officer Rene Abrea, Atty. Fred Mercado, Hawaii-based businessman Pito Teves, Balikbayan Engr. Ben Gonzales, Dr. Dodong Seno, Engr. Ben Pepito, kanhi Cebu City councillor Engr. Lito Roden, Boy Lim ug Pinong Galo. Anaa si Rudy Roble nga moduyog sa mga buot mosing-al aron magpadungog sa ilang batan-ong tingog.

Apan igo na lang sila sa paghandum sa maayo nga pagtagad ug kahigayunan nga gihatag ni White Gold Club President (anhing) Joseph Gaisano. Si Ms. Sonia Go, opisyal sa White Gold, ang nagpahimutang ug nagtagad sa mga senior citizens inabagan ni Mr. Joey Gaisano. Anaa usab kanunay si Peter Gaisano.

Karong Hunyo 30, ang White Gold Club mosira aron mohimo og mga kausaban pinasubay sa lakaw sa panahon. Adunay 4-storey mall nga tukoron sa ila karong nahimutangan ug walo ka mga state-of-the-art moviehouses ug rentable areas. Molungtad ang pagtukod og kapin sa duha ka tuig. Ang White Gold, Inc. maoy anchor store. Sumala sa broadcasters “This is White Gold Club signing off.” (msr1144@yahoo.com)


VIEW COMMENTS