SECTIONS
Saturday August 18, 2018
SUPERBALITA CEBU

Nalzaro: Internal cleansing sa PNP?

PATAY si Senior Inspector Raymund Hortezuela sa dihang misuway kini sa pagsukol sa iyang mga kaubanang pulis nga sakop sa counter-intelligence atol sa buy bust operation niadtong Domingo sa gabii sa Tipolo, Mandaue City. Matod pa sa kadagkuan sa kapulisan sa rehiyon nga si Hortezuela protektor sa napatay nga drug lord nga si Jeffrey “Jaguar” Diaz kaniadto. Usa usab siya ka drug user.

Sa dihang napatay si Jaguar, namaligya na og drugas si Hortezuela. Bout ipasabot nga drug dealer na gyud siya. Nabalhin didto sa Negros Oriental. Gipa-ubos siya sa surveillance sa PNP counter-intelligence hangtod nga siya napatay atol sa buy bust operation. Ang nakapait kay walay madawat nga lump sum benefits ang iyang nahibilin nga pamilya. Hugtanong gipanghimakak sa iyang pamilya ang kalambigitan sa maong opisyal sa ilegal nga drugas.

Niadtong miaging gabii, laing pulis ang gipusil patay didto sa lungsod sa Alegria. Ang biktima mao si PO3 Jonathan Tilos, nga taga Cebu City apan didto madestino sa lungsod sa Ginatilan. Didto sa Alegria si Tilos kay nag-gym. Matod pa sa mga imbestigador sa Alegria police nga si Tilos nakakita og lalis sa usa ka wala mailhing tawo sa wala pa mosulod sa gym.

Sa paggawas niya sa gym, sakay sa iyang sakyanan, gibanhigan siya sa wala mailhing mga tawo nga sakay sa laing sakyanan. Matod pa sa kapulisan nga naapil si Tilos sa mga pulis nga nahilambigit sa illegal nga drugas ug na-identify siya sa grupo sa giingong druglord nga si Franz Sabalones. Dili na makatubag si Tilos ning pamasangil. Biktima usab kaha si Tilos sa internal cleansing sa PNP?

Daghan nang mga pulis nga gikatahong nahilambigit sa ilegal nga drugas ang napatay sa wa mailhing mga mamumuno. Biktima ba usab kadto sila sa internal cleansing apan mga hired killers lang ang nagbira? Kon binuhatan kini sa administrasyon sa “war on drugs” mas daghan pang mga pulis ang mangatumba ani kay daghan pa man diha ang nagpadayon sa ilang ilegal nga kalihukan. Patay pa more diay ni?

(bobbygnalzaro@gmail.com)


VIEW COMMENTS