SECTIONS
Saturday August 18, 2018
SUPERBALITA CEBU

Editoryal: Ang tumong

Editorial Cartoon by John Gilbert Manantan

SA iyang kampanya sa eleksyon sa 2016, usa sa mga saad ni Cebu City Mayor Tomas Osmeña mao ang pagplantsa sa land swap tali sa Kapitolyo aron maangkon na sa hinpit sa benepisaryo sa 93-1 ang mga luna nga ilang giukopar.

Sa ilang pagpirma sa kasabutan niadtong Disyembre 2016, si Osmeña niingon nga nagkinahanglan pa kini og pagtugot sa Konseho nga iya sa Team Rama.

Wa na siyay rason nga di matigayon ang land swap deal kay ang mga sakop sa Team Rama kaniadto ra nagsuporta niini.

Sukad makuha niya sa Konseho ang suporta, nahilom ang isyu sa 93-1.

Karon lang bag-o, naningil na si Konsehal Joel Garganera kon unsa nay dagan sa land swap, nakairog na ba kini o wa kay hagbay ra man nilang gitugtan si Osmeña sa pagpakigsabot sa Kapitolyo.

Karon, iya na usab nga gigamit nga lusot ang ordinansa sa Siyudad nga nagdili sa pagbaligya og luna sa South Road Properties (SRP) nga di ipaagi sa Konseho. Kay tipik man gud sa yuta nga ibaylo tali sa Kapitolyo naa sa SRP.

Lipatlipat ning iyaha.

Hayan gusto niyang libkason ang ordinansa nga iyang gitumbok nga nakababag. Aron di laksot tan-awon ang iyang intension nga pagwagtang sa ordinansa, iyang gamiton nga sampong ang land swap deal.

Kon di gani, iyang ihigot ang isyu sa kampanya ni Davide sa 2019 elections nga duol na lang. Mahimong yak-an kini niya ug paabuton ang piniliay.

Bisan asa aning duha, molampos si Osmeña sa pagpatuo nga siya ang manluluwas sa mga benepisaryo sa 93-1. Apan hayan ang tinuod niyang tumong mao ang pagpapas sa ordinansa nga gituyo pagbutang sa iyang mga kaalyado aron paggapos sa iyang higpit nga kaaway kaniadto.

Kon kini mahitabo, mas sayon na lang niya ang pagbaligya kay di na siya mag-agad sa Konseho.


VIEW COMMENTS