SECTIONS
Tuesday August 21, 2018
SUPERBALITA CEBU

Sugilanon: Kamatuoran

John Tam. Ybañez

Gun-ob, Lapu-Lapu City, Cebu

NAGBAROG ko sa aseras sa dalan G. Mangubat, dakbayan sa Lapu-Lapu nga ambihas og diyutay sa banko nga gialagaran ni Ronie nga akong bana. Gibantayan ko ang iyang paggawas tungod sa akong pagduda nga nagbinuang siya sa among kaminyuon.

Sa akong pamayhon wala gayo’y makaila nga ako si Bebeth nga magtutudlo sa Maribago Elementary School. Gihuwaman ko ang saya ni Nanay Charito nga giparesan sa gum-uson kong blusa ug may bandana nga bulok lila ang akong ulo. Daw tiguwang akong tan-awon sa akong gisul-ob. Gani, dihay batan-on nga nagdali sa iyang lakaw nga napandol sa akong tiil ug miingon, “Sorry, Iya!” Nahimuot ako sa hilom.

Natahap kong may laing babaye ang akong bana kay sa miaging pipila ka gabii tagdugay na man siyang mopauli. Gawas niana, kuwangan man pod ang suweldo nga iyang i-intrigo kanako. Gani, dihay kausa nga ako siyang gipangutana bahin niini, igo ra siyang miingon nga iyang gipamayad sa utang sa gawas nga wala ko masayri. Bisag taphaw ra ang iyang katarungan, wala na lang ko maglangas aron dili kami magkakalis. Dili ko gusto’g samok.

Sukad sa among panagtipon ni Ronie nga milungtad na’g kapin sa lima ka tuig, wa pa gyud kami magkaaway. Puyra buyag, hapsay ug malinawon ang among pagpuyo uban sa among mga anak. Hinuon, naay panagsang pagtaas sa tingog apan kutob ra diha; dili sama sa uban nga mangapusgay ang mga kagamitan sa balay. Alang nako, makabuysit ang paghimo sa ingon ug dili ako buot nga mahitabo kini kanamo ni Ronie.

“Wa ka ba mahibu’ng anang Ronie, Bebeth, nga halos tungang gabii na man na mahiuli?” matod ni Nanay Charito usa niana ka higayon. Sukad ma-biyuda ang akong inahan mitipon na kini pagpuyo kanamo.

“Mao bitaw nay akong gikabalak-an, Nay. Kalit lang nausab si Ronie karon nga tulo na hinuoy among anak.”

“Aw, abi ko ba’g wa ka lang magpakabana niini. Nya unsa may imong plano?”

“Buot kong manuop kaniya, Nay, aron akong masayran nganong tagdugay na siya mopauli. Ug usbon ko ang akong hitsura aron dili siya makabantay.”

NAPUGWAT ko dihang nasigpatan ko si Ronie nga miguho sa ganghaan sa banko. Nagpaingon siya sa akong nahimutangan. Gikulbaan ko kay basig iya kong mailhan. Apan mihunob ang akong kakulba kay igo ra man siyang miagi sa akong tungod. Gisundan ko siya nga namidpid sa aseras. Milabang siya sa pikas bahin sa dalan ug misunod sab ko. Diriyot hinuon ko masaghiri sa traysikol sa akong pagdinali.

Miliko si Ronie sa dalan Lopez-Jaena. Nakita kong misulod ang kanahan sa Rempan’s Carenderia. Apan wa na ko monunot kaniya. Nagpaabot lang ko sa gawas. Namasin ko nga dili siya magdugay sa sulod. Apan mitikyop na lang ang kangitngit wala pa gyoy Ronie nga mipakita. Hapit na ko pul-i sa pagpinaabot. Namanhod na ang akong mga bitiis sa pagbinarog.

“Karon ka gyong tawhana ka! Hisayran ko lang nga nagpakabuang ka’g babaye makaila ka gyud kinsa si Bebeth kon masuko!” nako pa sa hilom.

Nianang pagka alas 7:00 pasado sa gabii dihay duha ka binuhat nga nanggawas sa kan-anan. Inabagan sa kahayag sa bombilya sa gawas, nailhan ko ang usa niini. Sama ako sa kandelang giugbok pagkakita kang Ronie nga nagkapyot sa bukton niadtong matso ug bunguton nga lalake. Ingon sa dili ako makadawat sa kamatuoran nga akong nasaksihan. (Katapusan)


VIEW COMMENTS