SECTIONS
Tuesday August 21, 2018
SUPERBALITA CEBU

‘Sa internet, may forever…’

KARONG Dominggo, magsadya ang taga Convergys tungod sa ilang tinuig nga kalihukan nga gitawag og Hugyaw 2018 sa University of Southern Phils. Foundation gym sugod sa alas 10 s.b.

Alang sa mga taga Convergys, mga panghinaut sa usa ka malampusong kalihukan.

* * *

Usa ako sa daghang mga nalipay sa pagdaug sa Golden State Warriors sa niaging kampyonato sa NBA batok sa Cleveland Cavaliers. Tinuod kaha nga ‘Everybody loves a winner’?

Sa akong kabahin, tungod kini sa akong kinaiya nga may pagka rebelde. Wala ko mosakay sa kainila ni LeBron James. Nagpalahi ko sumala sa ako nang naandan ug didto ko sa kontra nidapig.

Unya kay nasubli na man sab. Aw, alegre! Anà!

* * *

Pila sa mga pelikulang akong natan-aw karong pipila ka mga bulan, mga horror movies. Sukad pa niadtong estudyante pa ko, horror ug suspense gyud na ang akong paborito.

Duna hinooy higayon nga nisipyat kog tan-aw sama niadtong Metro Manila Film Festival.

Di na nako sipyaton kining umaabot nga Cry No Fear sa Viva Films nga gibidahan nila ni Ella Cruz ug Donnalyn Bartolome. May record na sa paghimog pelikulang makahadlok ang direktor nga Richard Somes.

Kauban sa pelikula sila si Lito Pimentel, Lander Vera-Perez, Christopher Roxas ug Patricia Javier. Sa Hunyo 20 na kini isalida. Molinya ko. Hehe.

* * *

Morag subsob na ang pagpangayog public apology sa telebisyon ug sa social media. May kinihaay pa man gani.Kon hinan-aw mog telebisyon o kon duna moy social media account, seguradong nahibalo na mo kon kinsa ang mga nalambigit sa mga hitabo nga ingon niini.

Duna man guy mga higayon nga di ta makapugong sa atong gibati labina kon taas kaayo ang lebel sa emosyon ug makapagawas tag mga pamahayag nga makasakit sa isigkatawo.

Ambot kon sa higayon nga ipamulong o isulat nato ang maong mga pamahayag, naghunahuna ba kita sa epekto niini sa mga hingtungdan. Lagmit, wala.

Mao nga gikinahanglan gyud nga atong hunahunaon sa makadaghan kon wa bay masakitan sa di pa nato buhian ang atong gibati.

Di na baya gyud matulon og balik ang mga pulong nga ato nang iluwa. Sa bahin sa social media, bisan kon ma-delete na nato ang atong i-post, kalagmitan duna nay nakabasa niini, gi-screen shot na ug gi-share.

Lisod na pagbakwi kon mapagawas na. Duna toy usa ka resource speaker sa usa ka forum atol sa usa sa mga pagsaulog sa Press Freedom Week nga niingon: ‘Sa internet, may forever.’ Bitaw no?


VIEW COMMENTS