Binasi sa Lucas 1:1-4; 4:14-21

Niadtong milabay nga Biyernes nahinayon sa Sugbo ang usa ka panagpundok sa unom ka mga kandidato alang sa pagkapresidente. Ubay-ubay ang mitambong aron maminaw ug moaninaw o mopakpak sa ila nang napilian. Usa sa mga pundok nga mitambong gikan sa kalihukan sa Dilaab. Lakip kini sa unang matang sa pundok nga naminaw arong moaninaw.

Click here for stories and updates on the Sinulog 2010 Festival.

Adunay gibasihan ug sumbanan ang Dilaab. Kini mao ang bunga sa CiDE (kun “Circles of Discernment for Elections”) seminar nga gimugna ug gipaambit sa maong kalihukan sa ubang mga diyosesis sa Pilipinas.

Nagsugod ang CiDE seminar sa pangutana: “Ingon ani na lang ba kita?” ug gitapos sa lain pang pangutana: “Unsang matang sa mga lider ang atong gikinahanglan alang sa nasud?” Ang katapusang pangutana may kalambigitan sa pamaagi sa mga patigayonan diin kon adunay mangita og trabaho, ang proseso sa pagpili kon kinsa sa mga aplikante ang pilion mao ang nangita og trabahante.

Kining maong paagiha wala sunda sa panahon sa piniliay. Ang naandan mao nga ang mga kandidato maoy mokombinsi sa mga botante nga botohan sila imbis nga magsugod usa nga aninawon sa mga botante kon unsang matang sa lider ang ilang gikinahanglan una pa sila mangita sa maong mga lider.

Bali gyod kini ug tan-awa unsay naabtan sa atong nasud tungod niini.

Sa kapin kon kulang 1,500 ka mga partisipante sa 24 ka mga grupo, may lima ka mga kalidad ang gipangita sa mga tawo: ang pagkamahadlukon sa Dios; ang pagkamaayong moserbisyo; ang pagkamaantigo; ang pagkaligdong; ug ang pagka “pro-life.” Mga 40% mipili sa pagkamahadlukon sa Dios ug ang duha nga kalidades ang ikaduha nga mikabat og 19% matag usa.

Makaingon kita nga ang kinauyokan sa tanan mao ang pagkamahadlukon sa Dios kun “God-fearing.” Makaingon pod tingali kita nga ang laing upat nga mga kalidades nanukad sa o ang sumbanan niini mao ang “God-fearing.” Sa ato pa, kon mahadlukon sa Dios kinahanglan maayo usab moserbisyo, maantigo usab, ligdong, ug moamping sa kinabuhi.

Unsaon man nato pagkahibalo kon ingon ani ba gayod ang ilang mga kalidades. May gitawag nga LASER nga mga pangutana nga mahimong gamiton alang niini. Apan sa sunod na pod kini nga panahon nga atong pagahisgotan.

Nahuman ang panagpundok sa mga “presidentiables” sa usa ka gitawag nga “covenant signing” diin ang mga kandidato misaad sa usa ka malinawon, limpyo ug lunsay nga piniliay.

Solemne kuno ang panahon sa pagsulat sa mga kandidato sa ilang mga pangalan. Ang maong kasabutan nagkanayon nga kon unsay ilang pagabuhaton sa panahon sa pangampanya ug piniliay, mao kini ang mahimong sumbanan ug basihanan sa panahon nga sila molinkod na sa pangagamhanan. Kon buot sila nga malinawon ang ilang pagpangalagad, karon pa man kinahanglan magmalinawon ang piniliay.

Ang ebanghelyo naghisgot sa mga saksi ug mga alagad sa Pulong sa Dios. Kini sila mga tawo nga didto mismo sa panahon ni Jesus ug mipaambit sa ilang mga panumduman, panghunahuna, ug pamalandong mahitungod kang Jesus ngadto sa uban nga wala makakuyog kaniya. Sa maong pagsaksi nila, nahimo silang mga alagad sa Pulong sa Dios.

Apan ang maong panagsaksi ug pagpangalagad wala magpabilin sa panahon sa mga unang sumusunod ni Kristo. Nagpadayon kini sa atong panahon ug usa sa mga timailhan nga kini nagpadayon kon kita nga mga binunyagan maantigong mopahigayon ug mosunod sa kasabutan sama niadtong gihimo sa milabay nga Biyernes.