KALIT kaayo ang nahitabo kang Press Secretary Cerge Remonde.
Gikuha siya sa Labaw nga Makakagahom samtang naa sa ibabaw.
Kon atong tan-awn pagtarong, ang katungdanan nga press secretary maoy labing taas nga makab-ot ni Cerge nga usa ka sakop sa media samtang naa siya sa pamilya sa presidente diha sa Malacañang.
Wa na gihulat nga mokanaog siya kuyog kang Presidente Gloria Macapagal-Arroyo inig human sa piliay.
Hinuon, nahitabo kini human sa miaging Sinulog diin aktibo kaayong nisalmot si Cerge sa mga relihiyusong mga kalihokan.
Lalim bay si Cerge mismo ang niguroy sa karo nga gisakyan sa imahen ni Senyor Sto. Niño diha sa prosesyon nga nisubay og taas nga ruta.
Aron malikayan nga mag-abot ang ulo ug ikog sa prosesyon, didto kini giagi sa P. del Rosario Extension padulong sa Private dayon liko sa dalan V. Rama ug B. Rodriguez.
Daghan ang naka-ingon nga daw nanamilit na si Cerge dihang sa unang higayon nagsul-ob kini og barong samtang nibira sa karo.
HAYA
Matod pa ni Marit Stinus Remonde, ang asawa ni press secretary, naguol kini kay bisan sa tininuod niining pagpasabot sa baruganan sa kagamhanan sa lain-laing mga isyo, daw wa na man siya tuohi sa mga sakop sa media.
Makita kini sa mga survey karon nga padayon ang pagka unpopular sa presidente bisan pa man sa iyang mga nabuhat nga kaayohan.
Ambot kon nasayop ba ko apan diha sa kamatayon ni Cerge, makita nato kon giunsa pagmahal siya sa mga sakop sa media dinhi sa Sugbo ug sa kaulohan.
Ang pagdagsang lang sa halos tanang mga sakop sa media diha sa iyang haya sa Malakanyang sa Sugbo, maingon nato nga usa ka dakong public relations achievement ni Cerge.
Lalim bay gawas nga nag-abot ang mga sakop sa media nga lisod gyud tapukon sa ordinaryong mga adlaw, diha pa gyud ang daghan kaayong mga negusyante ug mga politiko gikan sa lain-laing kampo.
Sa mga adlaw sab human namatay si Cerge, daw nakalingkawas og kadiyot ang Malakanyang sa mga grabing pag-ataki.
NATABANG
Alang kanako, bunga kining kasuod ni Cerge Remonde sa mga sakop sa media diha sa tininuod gyud niya nga pagtratar sa matag usa nga usa ka higala sugod kaniadtong usa pa siya ka reporter hangtod nga nisaka ug sa ngadto-ngadto nahimong press secretary.
Di gyud ko makalimot nga kaniadtong nabalhog kog makadiyot sulod sa stockade sa Metrodiscom sa panahon ni Presidente Marcos sa tuig 1985, si Cerge ang nikuyog kang Papa Doroy sa pagbisita kanako lawom na sa kagabhion.
Sulod sa katuigan ug bisan namatay na si Papa, makasangpit gyud dayon kaming mga magsuon kang Cerge. Sa ilang kasuod sa akong amahan, giisip na kami ni Cerge nga pamilya.
Daghang salamat, Mr. Press Secretary.
BLOG
Duna diay koy gi-post kabahin sab ni Cerge sa www.inbetweencoumns.wordpress.com.