ITUMOD na sa katapusang kapahulayan si Press Secretary Cerge Remonde karong adlawa didto sa iyang yutang natawhan sa lungsod sa Argao. Didto matawo si Cerge sa barangay Lamacan, 51 ka tuig na ang nakalabay. Didto siya makakita sa unang bidlisiw sa haring adlaw. Didto unang mabati ang iyang uha ug didto usab malubong ang iyang pusod. Karon, mibalik na siya sa iyang yutang natawhan ug mopahuway na sa dayon.
Sama kanako, gikan usab sa kabos nga pamilya si Cerge. Mao siguro nga dali kaming nagkasuod. Nakigbisog, nakigbugno sa kawad-on aron lang makab-ot ang gitinguhang tingusbawan. Ang probensiyano nga nakatungtong sa Malakanyang sa iyang kaugalingong paningkamot. Dili basta-basta ang na-agian ni Cerge hangtod nga nakaabot siya sa kapunaw-punawan sa iyang propisyon.
EMOSYONAL
Usa ako sa namulong sa necrological services ni Cerge niadtong Biyernes sa gabii didto sa Malakanyang sa Sugbo. Wala gayod nako kapugngi ang paglugmaw sa akong mga luha. Naghuot ang akong dughan. Susama ang akong gibati sa dihang namulong usab ako sa mga tawo nga miduyog sa among kagul-anan sa dihang namatay ang akong pinalanggang inahan nga si Nanay Doring kapin na sa tuig ang nakalabay.
Akong gibatbat ang mga tam-is nga kagahapon nga nagkauban kami ni Cerge. Daghan kaming mga kasinatian nga angayan lab-ason. Sama sa akong gikaingon sa nangaging mga lindog nga daw sama sa igsuon ang among pagnaghigalaay ni Cerge. Mao nga wala gayod kalikayi ang paglugmaw sa akong mga luha.
NANUNGLO
Giapil na pod kong Mayor Tomas Osmeña sa isyo sa pulitika batok nila ni Atan Guardo, ang iyang kaatbang sa pagkakongresista sa south district ning dakbayan. Matod sa mayor nga kami daw ug ni Atan nag-ampo nga mamatay siya.
Pastilan si Tomas mora man og nakasimba o nahibawo kon unsay anaa sa akong huna-huna. Wala na bay gayoy laing isyo si Tomas nga iya man akong giapil sa pulitika? Ngano god ako man nang himuon. Masuko ang Ginuo ana nga mag-ampo ka alang sa kaalautan sa uban nga morag manunglo ka.
Sa matag higayon nga ako mag-ampo, akong unahon ang akong kaugalingon. Ikaduha mga sakop sa pamilya ug mga suod nga higala. Dili ako relihiyuso nga pagkatawo apan si Tomas apil sa akong pag-ampo labi pa atong panahon nga na-diagnosed ug na-operahan sa iyang cancer sa pantog. Ayaw intawon i-trapo ngari nako kanang imong binuhatan mayor kay dili na nako kinaiya nga manunglo.
(bgnalzaro@gmanetwork.com)