SECTIONS
Monday August 20, 2018
SUPERBALITA CEBU

Bag-ong Marina building gisubhan

HUMAN sa 42 ka tuig nga pinaabot, aduna nay kaugalingon nga buhatan ang Maritime Industry Authority (Marina) sa Central Visayas.

Kagahapon, gisubhan ang P60 milyones nga bag-ong edipisyo sa Marina 7 nga nahimutang sa 2,000 metro kwadrado nga luna sa Sitio Sudlon, Lahug, siyudad sa Sugbo nga gipagamit sa kagamhanan sa lalawigan sa Sugbo.

Sumala ni Marina 7 Director Jose Venancio Vero Jr., nga natuman ang ilang pangandoy makabaton og kaugalingon nga buhatan pinaagi sa tabang ni Angkla party-list Rep. Jesulito Manalo.

Matod niya, sukad natukod ang Marina niadtong 1976, lima na ka lainlaing mga building ang ilang giabangan aron mahimo nilang opisina.

Si Vero namahayag nga si Manalo ang nanghingusog nga magahinan sila og pundo alang sa kaugalingong buhatan nga ang pundo gi-download ngadto sa Department of Public Works and Highways (DPWH) ug sa sunod buwan matugyan na kini ngadto nila.

Pinaagi niini, minilyon ka pesos ang ilang madaginot kay dili na sila kinahanglan moabang og buhatan.

Sa kasamtangan, naa sila mag-abang sa usa Qimonda IT Center sa North Reclamation Area. (SCG)


VIEW COMMENTS