MOABOT sa 131 ka mga pulis ang gipang-dismiss sa serbisyo samtang 151 ang gipasakaan og mga kaso tungod sa kapakyas pagtambong sa mga drug case.

Ang maong lakang sa Philippine National Police (PNP) paglimpyo sa ilang ginsakupan, gidayeg pag-ayo sa Dangerous Drugs Board (DDB) kay nagpakita kini sa kaseryuso sa kapulisan sa ilang kampanya batok sa illegal nga drugas.

Click here for stories and updates on the Sinulog 2010 Festival.

Ang Philippine Drug Enforcement Agency (PDEA) nga maoy lead agency batok sa illegal nga drugas, niduso ngadto sa PNP og talaan sa nabasura nga mga drug cases sa niaging tuig diin 875 ka mga pulis ang nagsilbing saksi sa mga kaso.

Apan sa gihimong pakisusi nasuta nga 637 lang ka mga drug cases ang na-dismiss diin duna kini 813 ka mga pulis isip mga saksi sa kaso.

Sa gihimong imbestigasyon sa PNP, niresulta kini sa pagpalagpot sa 131 ka mga pulis samtang 125 ang gipahamtangan og mga silot sama sa suspension, demotion, forfeiture sa sweldo ug reprimand.

Apan ang gikalipay pag-ayo ni DDB Undersecretary Clarence Paul Oaminal mao ang report sa PNP nga dunay 151 ka mgapulis ang gipasakaan og kasong criminal gumikan sa kapakyas pagtambong og mga court hearing.

Matod ni Oaminal nga ubos sa section 91 sa Republic Act 9165 kun ang balaod batok sa illegal nga drugas gilatid ang responsibilidad ug tulubagon sa mga sakop sa law enforcement agency ug mga government officials ug mga trabahante nga mapakyas pagtestigo sa kaso.