2 ka tiguwang loyal kaayong fans ni Cerge, miaguwanta og huwat

MANAGHIGALA nga parehong nangangkong mga fan ni Press. Sec. Cerge Remonde kabahin sa gatosan ka mga Sugbuanon nga wa gyud mosipyat sa pagduaw sa haya niini sa Malacanang sa Sugbo niadtong Biyernes.

Gani sayo pa lang sa buntag dihang niabot sa ALU compound diin nahimutang ang estasyong dyLA sila si Zosima Carvellida ug Teresita Conson, parehong 73-anyos ug taga barangay Camputhaw, sa pagtuong ihapit ang lawas ni Remonde.

Matod sa duha nga nisayo gyud sila aron di mauwahi sa pagsud-ong sa lawas ni Remonde kay nagtuo silang daghan gyud ang motan-aw niini isip pagyukbo sa katapusang higayon.

Wa igsapayan sa duha nga nagpaabot og pipila ka oras sa Malacanang sa Sugbo.

Gani nagdala na sila og bawon kay di sila mobiya kon ugaling kinahanglan pa nilang molinya.

“Reporter pa lang na si Cerge nagsunod na gyud mi ana niya. Una kong nakakita ana niya nga siya ang nag-cover sa Redemptorist atong nay na-missing nga pari,” paghandom pa ni Carvellida, kinsa niangkong nakahilak gyud dihang iyang nasayran sa balita ang pagkamatay ni Remonde.

“Na-shock gyud kayo k okay ang unang balita akong nadunggan gi-atake nya pagsunod na nga balita namatay naman. Ako gyung gihilak kay akong gipagawas akong gibati,” pag-angkon ni Carvellida, kinsa nitug-an nga duna gyud siyay gihimong poem kaniadto alang kang Remonde.

Dihang nasayrang dad-on sa Sugbo ang lawas ni Remonde, nagsabot dayon sila si Carvellida ug Conson nga moduaw gyud sa haya.

Gani ang duha nagdala og mass card kay matod nila mao nalang kini ang ilang mahatag ngadto sa biyuda ni Remonde.

Si Conson dihang giinterview wa usab makapugong sa iyang mga luha dihang gihandom niini ang ilang pagsige og duaw kaniadto sa matag birthday ni Remonde sa dyLA.

“Matag birthday di gyud mi masipyat pag-adto sa dyLA. Amo siyay dad-an sa iyang mga paborito, grapes, puto sikwate ug mangga,” paghandom pa ni Conson sa malipayong mga higayon nga ilang gikauban si Remonde.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph