Editoryal: SK sa Minglanilla

Editorial Cartoon by Ariel Itumay
Editorial Cartoon by Ariel Itumay

LAIN na usab nga kontrobersiya ang mihamok karon sa lungsod sa Minglanilla.

Ning higayona, kini may kalabutan sa bag-ong napiling Sangguniang Kabataan (SK) Federation president ug sa napukan nga kaatbang niini kinsa porsigido karon nga mopasaka og election complaint batok sa nidaog.

Kon way kakulian o kasabutan nga makab-ot, ang SK Federation president nga si John Jesson Gimenez mag-atubang og reklamo nga ipasaka unya ni SK Chairman Justin Tecson sa Barangay Poblacion, Ward 2.

Sa iyang reklamo, si Tecson mialegar kang Gimenez nga midala sa mga SK officials sa Minglanilla sa usa ka beach outing niadtong Mayo 27, duha ka adlaw sa wala pa ang election sa SK federation.

Ubos sa joint memorandum circular no. 2017-01 nga gilagda sa DILG, Comelec ug sa National Youth Commission (NYC) gidili kining maong kalihukan sulod sa lima ka adlaw sa dili pa ang piniliay.

Kon tinuod man gani nga kini nahitabo sa Mayo 27, bisan unsaon pa nato og bali-bali pagbasa ang maong memorandom klaro ug tataw nga nakalapas si Gimenez sa maong lagda.

Samtang atong gihangop ang sugyot ni Municipal Councilor Rajiv Enad nga mangayo og opinion sa DILG, pero ambot og unsa pay ilang gipangita nga anaa na may balaod nga igo na nga katamdan sa ilang desisyon.

Aron pagkab-ot sa kaangayan, ilang pangayuon ang tanang konkretong ebidensiya ni Tecson nga nagpakita kon unsa ka tinuod kining iyang alegasyon ug unsa usab ka ka tinuod ang depensa ni Gimenez.

Kining kasoha makakuha og interes sa mga taga Minglanilla kay ang reklamo adto man ipasaka sa konseho unya, matod pa, kini diay si Gimenez apo man ni Minglanilla Municipal Administrator Concordio Mejias.

We’ll see kon tinuod ba nga wala gyuy “whitewash” nga mahitabo sa imbestigasyon, sigon sa pasalig ni Enad.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph