BOMBA sa Ikaduhang Gubat sa Kalibutan napalgan nga giabandunar sa dapit nga pahigayunan sa disco sa may Quijano compound sa brgy. Calamba, dakbayan sa Sugbo pasado alas 10 kagahapon sa buntag.

Ang napalgan mao ang lima ka vintage bombs.

Si Barangay Kapitan Victor “Jojo” Quijano niingon nga ang maong mga bomba gibiyaan sa mga bata nga namasura ug ipatimbang unta.

Click here for stories and updates on the Sinulog 2010 Festival.

Apan way nidawat sa maong mga butang tungod sa kahadlok, hinungdan nga gidala pagbalik sa mga bata ug gibiyaan sa bakante nga luna sulod sa Quijano compound.

Si Barangay Konsehal Eldy Ygonia nga didto sa dapit nga nangulo sa mga nanglimpyo sa dapit, maoy unang nakatawag sa Barangay Hall.

Ningresponde dayon ang mga sakop sa Bomb Dissposal Team sa Mobile Patrol Group ug gikuha ang maong mga bomba.

Matod pa sa mga ningresponding pulis nga mobuto pa ang maong mga bomba ilabi na kon madukdokan ang firing pin.

Samtang gipahibawo usab ni Quijano nga dul-an sa 300 ka mga pamilya ang nakadawat og bugas kagahapon gikan ni Kongresista Antonio Cuenco.

Ang maong mga pamilya maoy biktima sa sunog sa milabayng tuig diha sa sityo Almacen ug sityo Alseka nga ubos sa iyang barangay. (JFT)