PATAY nang niabot sa tambalanan ang babayeng pasahero sa usa ka Hyundai nga awto human matuhog sa naputol nga steel railings sa may dalan A.C. Cortes, dakbayan sa Lapu-Lapu kagahapon sa kaadlawon.
Ang biktima sakay sa awto nga gimaneho sa usa ka Koreano nga nadasmag sa railings sa nahisgutang dapit.
Ang awto nadasmagan sa duha ka mga sakyanan human sab kini mobangga og una sa railings.
Gideklarar nga dead on arrival (DOA) ang biktima nga si Cherry Mariano, sa Mandaue City Hospital.
Base sa initial nga imbestigasyon sa Mandaue City Traffic Division, ang Hyundai nga awto nga nagdala sa plate no. YDV-812 gimaneho sa usa ka Korean national nga si Joo Hyung Lee.
Samtang nagsubay sa A.C. Cortes Ave. paingon sa dakbayan sa Lapu-Lapu, paghatungod sa planta sa usa ka water distiller, nilahos ang awto sa puthaw nga railings nga anaa tunga sa karsada.
Sigun sa imbestigasyon ni SP01 Timoteo Quirol nga gumikan sa kakusog sa impact, nitalipsay ang sakyanan ngadto sa atbang nga lane.
Naatol sab kini sa pag-agi sa gikasugat nga Suzuki mini van nga nagdala sa plate no. YFV-463.
Human sa pagkabangga, nibanda na usab sa railings ang Hyundai ug nibalik na usab sa gisubay niini nga lane paingon sa dakbayan sa Lapu-Lapu.
Niigo pa gyud kini sa laing sakyanan nga Nissan nga awto nga nagdala sa plate no. LCB-318.
Human mabanggai, nibalik kini sa railings ug didto padung sa nisiwil nga puthaw nga railings.
Natusok sa outhaw ang windshield sa Hyundai nga niigo sa Koreano nga drayber.
Si Mariano natuhog gyud sa puthaw ingon man si Lee. Naangol sab ang laing pasahero nga si Geraldine Llaguno, 20.
Ang ubang biktima nga luwan sa laing sakyanan nakaangkon og gamay nga kadaot.
Daling gidala ang tulo ka mga biktima sa tambalanan apan patay nang nidangat si Mariano sa ospital.
Si Lee anaa sa pribado nga tambalanan sa dakbayan sa Sugbo apan under arrest sa kasong reckless imprudence resulting to homicide and multiple injuries.