DIGOS CITY -- Gipahugtan pa sa Bureau of Jail Management and Penology (BJMP) sa siyudad sa Digos ang seguridad sa ilang pasilidad aron masigurong di kini malutsan og ilegal nga druga ug walay mahitabong jail break.
Nasayran nga matag karon ug unya nagahimo og surprise inspection ang mga sakop sa City Anti-Drug Abuse Council (Cadac) sa selda sa mga piniriso aron masigurong wa’y nakasud nga druga sa lugar.
Sumala ni BJMP Jail Warden Chief Insp. Presco Manisan, nga gawas sa ilang pagbantay aron di makasulod ang gidiling druga, gipaniguro sab nilang di na mahitabo ang jail break.
Kahinumdoman usa ka priso ang namatay ug nasikop ang laing usa human misulay pagpuga sa ilang selda niadtong buwan sa Marso.
Sa nakalabay nga Mayo 30, milingkod sa pwesto si Manisan ug gilayong nagmando sa tanang jail guards nga siguruhong di makalusot ang mga kontrabando, gikan sa ilegal nga druga ug mga gidiling gamit aron luwas ang matag priso.
Bisan mga bisita moagi sab sa makuting inspeksyon aron di makapalusot og mga gidiling butang.
Dako sab ang pasalamat sa opisyal ngadto sa lokal nga gobyerno tungod kay wa sila gipasagdan sa ilang inadlaw nga operasyon sa pasilidad. (Orlando B. Dinoy)