SECTIONS
Friday July 20, 2018
SUPERBALITA CEBU

Konsehal sa babag namusil

GIPUSIL sa kagawad sa Barangay Babag, bukirang dapit sa dakbayan sa Sugbo, ang usa ka residente sa naasoy nga dapit kinsa iyang gikabangi pasado ala-una kagahapon sa hapon duol sa barangay hall.

Ang suspek giila nga si Renante Bacarisas, numero unong konsehal sa Babag, giingong nipusil kang Jojo Ibona, kinsa mangigihaw og baboy ug bana sa kanhi barangay health worker (BHW).

Si Jasmin Navarro, usa ka molupyo sa Babag, nagkanayon sa Superbalita Cebu nga dugay nang adunay bikil ang duha ug nisamot sa nilabay nga eleksiyon sa barangay.

Matod ni Navarro, nagsakay ang duha sa ilang tagsatagsa ka sakyanan sa wala pa nahitabo ang pagpamusil sa naaoy nga dapit.

Unang gipusil, subay sa pamahayag ni Navarro, ang sakyanan nga gimaneho ni Ibona ug naigo sa ikaduhang boto sa wala pa matinong kalibre sa armas ang biktima sa iyang liog ug kilid. Human sa insidente, ang biktima gidala sa tambalanan sa dakbayan sa Sugbo ug atol sa pagsuwat ning balita, wala pa mahibaw-i ang kahimtang ni Ibona.

Gipadayag ni Navarro, kinsa nihulagway kang Bacarisas nga usa ka maayong tawo, apan niingong wala na makaagwanta sa ilang away ni Ibona, gikataho nga motahan ang kagawad ngadto sa Mabolo Police Station atol ning pagsuwat.

Dugang nasayran sa Superbalita Cebu nga si Bacarisas maoy sinaligan ni Mayor Tomas Osmeña sa dapit ug nagsilbing pangulo sa Barangay Mayor’s Office (BMO) sa Babag. (B)


VIEW COMMENTS