SUPERBALITA CAGAYAN DE ORO

Todino: Kinahanglan ba'g armas ang barangay kapitan

KON nuntan nato ang pag-uyon sa DILG nga tugtan ang mga barangay kapitan sa pagtiner og armas, unsa may kasegurohan nga dili maabusohan kining maong polisiya.

Ang katarungan ni DILG officer-in-charge Eduardo Ano mao nga proteksiyon kini sa barangay kapitan batok sa hulga sa ilang kinabuhi.

Gitataw hinuon ni Ano nga itugot lamang ang pag-isyu og armas de fuego dependi kon unsa ka dako sa hulga sa kinabuhi sa opisyal sa barangay.

Gawas pa niana, mopagawas sab og regulasiyon ang DILG kabahin sa pag-isyu sa armas.

Dunay 42,029 ka mga barangay sa nasud apan dili tanang kapitan sa barangay dunay hulga sa ilang kinabuhi.

Masabtan nato ang sitwasiyon sa kapeligro sa kinabuhi, ilabi na sa barangay kapitan nga agresibong mipatuman sa kampaniya batok sa illegal nga drugas, sugal o uban pang kalihukan supak sa balaod.

Dunay mga barangay nga hapsay ug linaw ang ilang dapit ug walay hulga “tingali” batok sa mga opisyal.

Apan, kining pag-isyu sa armas garantiya ba gyud nga makalingkawas ug makapanalipid ang opisyal batok sa daotang mga elemento sa ilang barangay?

Nganong dili man lang mokuha og escort nga polis dugang sa mga barangay tanod kun gikinahanglan gyud, labi na sa paglakaw sa barangay kapitan?

Kining mga killer, naniguro baya pud na sila sa ilang kinabuhi. Ug naniguro sab na sila nga limpiyo ang paghimo nila sa misyon. Busa may armas man o wala ang barangay kapitan, way makapugong sa usa ka assassin sa pagpatay sa ilang target.

Ang tiunay man gud nga sitwasiyon sa atong nasod karon, mosugot o dili ang DILG nga armasan ang mga barangay kapitan, daghan nang mga kapitan nga nagtiner og armas. Naa ganiy mga konsehal nga nabalita nga nanion!

Unya unsa may kalainan sa yanong molupyo. Wala bay hulga sa kinabuhi ang publiko karon? Matag karon og unya, nia kining mga hold-uper armado ug mopatay gani. Kon mataymingan ta, delikado ug mabutang gyud sa peligro atong kinabuhi. Nganong dili man pud tugotan ang yanong molupyo magdala og armas aron makapanalipod sa iyang kaugalingon?

Kining magtiner man gud ta og armas, init kaayo sa kamot ug mopasuwabi usahay kining kaisog ug garbo. Sa init nga sitwasiyon, usahay lisod mapugngan mogara dayon kining armado nga tawo.

Ambot kon nalantawan ba sa DILG ang sangpotanan unya kon tugtan nila nga makadala og armas ang mga barangay kapitan. Timan-i dili baya igo lang ang pagbitbit og armas, kinahanglan maantigo ka mogamit, ug abtik sab ka mobunot labi na sa dinalian ug kalit nga panghitabo.

Basi baya magpunay nalang didto sa shooting o firing range magpraktis kining mga barangay kapitan nato. Ug dili na makuntento, mopalait na og dagkong mga armas.

Para nako, igo na kining mga pulis dugang sa barangay tanod o security guard nga mo-eskort sa barangay kapitan kon grabe man gyud ugaling ang hulga. Dili na nato dugangan pa og armas ang mga sibilyan kay dali kaayo ning manakod.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph