DAVAO DEL NORTE -- Halos tanang dalan sa Davao del Norte magamit alang sa ipahigayong National MusaMan TriDavNor 2018, usa ka standard distance triathlon top billing sa selebrasyon karong tuiga isip kabahin sa 51st founding anniversary sa probinsya.
Gumikan sa maayong gipakita nga hitabo sa programa niini sa inaugural race sa nakalabay nga tuig, kini ang nahimong hinungdan nga mas pasadya-on ug paalegrehon pa karon sa mga organizers ang MusaMan TriDavnor 2018 karong umaabot nga Hunyo 24.
Mokabat 400 triathletes ang gilauman nga moapil sa 1.5-kilometer swim, 40-km. bike ug 10-km. run endurance challenge, diin nagtumong sa pagpromotar sa healthier lifestyle samtang nagpromotar sab sa tourism sites sa probinsya.
Ang langoy magsugod sa lapyahan sa Banana Beach Hijo Resorts, ang unang resort sa nasud nga gipalibutan sa banana plantation diin ang mga atleta mosikad nga padung Hijo Resorts Road-Surigao-Davao Coastal Road-Pan-Philippines Highway sa Tagum City nga dunay daghang palm trees.
Ang mga partisipante moagi sa Capitol Road ug sa mga dagkong kalsada diin modagan sila padung na sa finishing line didto sa Davao del Norte Sports and Tourism Complex, nga maoy gihimong venue sa 2015 Palarong Pambansa ug 2016 Batang Pinoy National Games.
Ang dagkong ganti nga salapi naghulat sa kinsa ang makakuha sa P40,000 alang sa elite category; P15,000 sa team category; P6,000 alang sa relay category; ug P5,000 ngadto sa age group category.
Usa ka specially-designed hand-made indigenous trophy ang giandam sa mamahimong top three winners sa matag category.
Ang "The Rising Davao del Norte Trophy", maoy token gikan sa malambuon nga kultura ug katribuhan ug tradisyon sa Davao Del Norte gikan sa island to highland.
Usa ka post gikan sa Facebook account sa Provincial Sports and Youth Development Office (PSYDO) nagpasabot nga sa asymmetrical strokes ug patterns sa sculpted clay diin nag-highlight sa kalamposan ug pagkamalig-on nga mga istorya sa kinabuhi luyo sa mga pagsulay.
Ang artists mikuha sa kurti sa saging diin gitawag nga "musa", nga mao ang usa sa pinakalig-on nga tanum sa kalibutan.
Ang 51st Araw ng Davao del Norte celebration gisuportahan sa Tagum Agricultural Development Company Inc. (Tadeco) ug sa Ulticon Builders Inc., isip official anniversary partners.
Nahimong sponsors sa maong historic event gilangkuban sa Hijo Resources Corporation, Davao Metro Shuttle, Kapalong Cooperative, Tagum Cooperative Inc., ug LYR Group of Companies. (Uban sa taho ni Charlene Luna)