SECTIONS
Monday July 16, 2018
SUPERBALITA CEBU

30 ka kolehiyo mopaumento

ADUNA’Y 30 ka mga kolehiyo sa Central Visayas ang mopasaka sa ilang tuition karong nagsugod na usab ang klase alang sa school year 2018-2019, base sa natala sa Commission on Higher Eduction (CHED) 7.

Apan di pa kini makapagawas sa listahan niining mga tunghaan kon wa pay go signal sa CHED Central Office.

Matod ni Dr. Carlyn Dela Peña, education supervisor sa CHED 7, nga sa 30 ka kolehiyo, 20 niini ang nipasaka lang sa ilang freshmen level o 1st year samtang ang nahabiling 10, tanang levels.

Gibutyag ni Dela Peña nga sa mga aplikasyon sa tuition fee increase sa tanang levels, niabot og 14 ang ilang nadawat nga aplikasyon, apan tulo niini ang nibawi ug di na lang mopasaka samtang ang usa nakapahimulos sa libreng tuition sa gobyerno diin anaa kini sa lungsod sa Sibonga.

Sa 10 nga mopasaka sa tuition sa tanang level, pito niini kolehiyo sa Sugbo, duha sa Bohol ug usa sa Negros Oriental.

Samtang sa freshmen o 1st year level lang niabot sa 22 ang ni-apply apan ang usa wala makaabot sa timeline samtang ang usa dili matawag nga increase tungod kay bag-o lang kini nag-operate.

Sa 20, 16 ang kolehiyo sa Sugbo samtang ang laing upat sa Negros Oriental. (HBL)


VIEW COMMENTS