PAGPANAKOP sa mga estambay sa tibuok Central Visayas ipatuman na sa Police Regional Office 7 sugod karong adlawa nga maoy mando sa pagbisita ni PNP Chief Director General Oscar Albayalde dinhi sa syudad sa Sugbo niadtong miaging semana.
Ipatawag ni PRO 7 Director Debold Sinas ang iyang mga city ug provincial police office director aron hisgutan ang pagpatuman sa oplan Estambay.
Kini tungod usab sa mando ni PNP Chief Director General Oscar Albayalde nga angay na kining ipatuman sa labing dali nga panahon tungod sa kagustohan usab ni President Rodrigo Duterte.
Gipasabot ni Sinas nga ilang basehan sa pagpanakop sa mga estambay sa mga hilit nga lugar sa barangay ang ordinansa sa syudad nga bagransya diin mahimong sikopon ang mga tawo nga magsuroy-suory sa gawas sa balay sa lawom nang gabii.
Di lang ang bagransya ang mamahimong atubangong kaso sa mga estambay kon maatlan kini nga mag inom-inom diha sa daplin sa dalan.
Apan iyang gipasabot nga di sa tanang panahon nga ilang dakpon ang mga estambay sanglit mahimo sila nga badlungon lang una sa unang higayon ug papa ulion sa ilang tagsa-tagsa ka mga panimay.
“Kon naa mo nag-estambay sa ngitngit nga lugar, mao toy sitahon mga ingun ana, it does not matter sa time pero i-priority tung gabii, anytime could be implemented” matod ni Sinas.
Ang hepe sa Cebu City Police Office Sr. Supt. Joel Doria sa iyang bahin nagkanayon nga sama sa ilang gihimo sa Oplan Pokemon, ila usab nga ilakip na ang Oplan Estambay.
Aduna na siyay gipagawas nga kamandoan sa 11 ka police stations nga molusad sa halapad nga operation ug ipatuman ang ordinansa sa curfew diin kadtong mga batan-on nga maatlan tapukon sa usa ka basketball court ug pahibaw-on nga sa sunod nilang lusad sa oplan estambay dakopon na kini ug pasakaan ug kaso.
Wa mabalaka ang PRO-7 nga kuwangon ang ilang personnel sa pagpatuman sa Oplan Estambay sanglit mahimong moabag kanila ang barangay sa pagpatuman niini.
Matod ni Sinas nga mahimong ipadayon ang mga checkpoint sa kapulisan sa kadalanan aron mapugngan usab ang mga krimen nga mahitabo sa matag lugar sa Central Visayas isip kabahin sa Oplan Estambay.