SECTIONS
Thursday July 19, 2018
SUPERBALITA CEBU

Kawhi giibiran sa Cavaliers

MAS ningkusog ang hugonhugon nga mobalhin og laing team si Cleveland Cavaliers superstar LeBron James hilabi na ning puntoha nga duha na lang ka mga semana ug mahimo na siyang moambak sa free agency sa National Basketball Association (NBA).

Niini, ang Cavaliers wala sab nagpasagad ug naghimo kini’g lakang aron makapangandam sa posibleng mahitabo pipila ka mga adlaw gikan karon.

Ang Cavaliers nakigsabot na’g sugod sa San Antonio Spurs kabahin kang Kawhi Leonard, kinsa nihangyo nang daan sa Spurs nga magpa-trade.

Sa taho sa The Plain Dealer sa Cleveland, giingon nga naghunahuna na ang Cavaliers kon kinsa nga mga magduduwa ang puwede nilang itanyag aron ikabaylo kang Leonard.

Aduna sab laing taho nga naglambigit sa Phoenix Suns ngadto kang Leonard. Hinuon miingon ang Arizona Republic nga andam si Suns general manager Ryan McDonough niini apan labing seguro, dili nila ibaylo ang ilang katungod sa No.1 overall pick.

Gikataho sa ESPN nga nagplano si Leonard nga mobalhin sa Los Angeles Lakers apan nagdepende pa ang tanan sa mga mahitabo sa umaabot hilabi na kay naa sab ang Boston Celtics, nga nipadayag sab og intensyon sa kanhi Finals MVP ug two-time Defensive Player of the Year awadee.

Kabahin kang James, giingon nga nangusog si Houston Rockets All-Star pointguard Chris Paul sa paghaylo kang James nga makig-uban kaniya ug sa Rockets.

Si Paul mahimo na sab nga free agent sa offseason apan segurado kining mobalik ra gihapon sa Rockets, nga nakapugos sa defending champions Golden State Warriors og deciding Game 7 sa Western Conference finals sa bag-uhay lang nahuman nga 2017-18 season.

“Chris is going to return there,” batbat ni Adrian Wojnarowski sa ESPN.

“Right now, his focus isn’t so much on his own free agency, he’s trying to recruit LeBron James to Houston.”

Gipasabot ni Wojnarowski nga usa ka suod ni Paul ang nagsulti kaniya kabahin niini.

Ang Rockets naglabaw og 3-2 sa miaging Western Conference finals series apan human niini, wala nakaduwa si Paul sa nagsunod duha ka mga duwa gumikan kay naangol kini (hamstring) nga iyang nasinati sa Game 5.

“Yeah, he took it hard. But you know what, he’ll be back,” matod ni Rockets general manager Daryl Morey. “He’ll be back 100 percent and we’re ready to go.”

Kon ikauban nila ni Paul ug James Harden si James sa Rockets, hayan angayan na gyung makuyawan niini ang back-to-back champions Warriors.

Hinuon giangkon ni Paul nga lubog pa ang poruhan nga mobalhin si James sa Rockets apan nanghinaot siya nga mahitabo kini.

Kon dili makuha sa Rockets si James, nagtuo si Paul nga ang giingong “hari” sa basketball sa kalibutan mabalhin sa Lakers. (Reuters, ESL)


VIEW COMMENTS