DAVAO DEL NORTE -- Sa makausa pa, subli na sab nga mapasundayag ang Kadagayaan Festival 2018 sa Davao del Norte isip tipik sa selebrasyon sa 51st founding anniversary sa probinsya.
Naggikan sa binisaya nga pulong "dagaya" nga ang buot ipasabot, abunda, nga maoy pista sa selebrasyon sa pagpasalamat, pagpakita sa abunda nga abot sa kaumahan, garbo nga gigikanan, multicultural identity, pagkamamugnaon, ug ang pagkamalig-on nga Dabaonon maoy naglimin sa gikonsiderang usa sa mga grandehiyuso nga festival sa Davao Region.
Si Governor Anthony del Rosario maoy manguna sa opening sa festival ug mo-deliver sa iyang State of the Province Address (Sopa), nga dunay titulong “Ulat ng Pagbabago,” karong Hunyo 25, 2018 didto sa Davao del Norte Sports and Tourism Complex.
Sumala sa gobernador nga ang maong kaugdahan mahitungod na sab sa paghatag og pasidungog sa istorya ug kailhanan sa pagpakita sa kahiusahan sa Dabaonons sa maong probinsya.
Ang tema karong tuiga, "Bawat Araw, May Biyaya ng Pagbabago,” inspirasyon gikan sa gasa nga dala sa transformational change sa nasud.
“We continue to tread the path of relevant change and endeavor to provide all our people the best opportunities each day to achieve inclusive sustainable growth and development,” sulti ni del Rosario.
Apil sa mga gilauman nga mga bisita mao ang mga ambassadors ug mga consul generals, nga maoy manguna sa opening sa Brunei Darussalam-Indonesia-Malaysia-Philippines East Asean Growth Area (Bimp-Eaga) Tourism and Investment Expo.
Isip kabahin sa usa sa mga highlights sa Kadagayaan Festival 2018, ang expo mopakita sa exchange of culture and destinations sa Bimp, samtang naghatag sab og maayong oportunidad alang sa mga local tourism industry and entrepreneurs sa pagbaligya sa ilang mga produkto diri sa nasud ug bisan didto sa Eaga member countries.
Ang Kadagayaan Agri-Tourism Fair magpakita sab sa highly-interactive exhibits sa industry-based banner products, ug sa mga ginabisita gayod nga destinasyon sa probinsya.
Ang serbisyo sa gobyerno mas labaw nga mabati ug makita atol sa kaugdahan diin dunay gilain nga programa sama sa tulo-ka-adlaw nga BEST PEOPLE Festival of Services gikan sa Hunyo 26-28.
Ubang kalingawan sa festival gilangkuban sa 1st Mindanao-Wide Dog Sports Competition, Farmers-Technicians’ Day, Basta DavNor Sikat! Talent Grandfinals, Inter-LGU Basketball Championship, Hanas Dabaonon Skills Competition, Bb. DavNor 2018 Coronation Night, Hudyaka Street Dancing, Alay DavNor Walk 2018, ug daghan pang uban.
Mas pabonggahon pa ang festival pinaagi sa grand fireworks display nga magsimbolo sa grandehiyusong anibersaryo karong umaabot nga Hulyo 1.
Kini nga 51st Araw ng Davao del Norte gipaluyohan sa Tagum Agricultural Development Company, Inc. (Tadeco) ug Ulticon Builders, Inc. isip official partners sa programa.
Ang sponsor sa maong historic event gilangkuban sab sa MED 9, Hijo Resources Corporation, Davao Metro Shuttle, Kapalong Cooperative, Tagum Cooperative, Inc., ug LYR Group of Companies, samtang ang mga donors mao ang Holiday Garden Island Development Corporation ug ang TrueMoney Philippines.