LIGUASAN DELTA, Maguindanao -- Gikalipay sa mga mangingisda ang pagkailog sa militar sa dakong isdaan sa sulod sa Liguasan Delta adlaw nga Lunes, Hunyo 18.
Moabot sa 220,000 square kilometers nga isdaan nga misakop sa 29 ka lungsod ug duha ka probinsiya nga gilangkuban sa Maguindanao ug North Cotabato.
Nailog sa Joint Task Force Central ang Liguasan Delta nga gilubloban sa Dawla Islamiya Toraife Group uban ang mga langyaw nga terorista.
Patay ang 31 ka mga sakop sa Bangsamoro Islamic Freedom Fighters (Biff-Isis inspired group) apil ang upat ka langyaw ug usa ka sundalo sa usa ka semana nga law enforcement operation sa militar sa Liguasan Delta.
Dugay na nga nag-antos ang mga mananagat sa pagpanghasi kanila sa mga terorista sa Liguasan Marsh nga nag-una nga tinubdan sa ilang panginabuhi sa Maguindanao ug probinsiya sa Cotabato.
Susama ang sitwasyon sa Liguasan Marsh sa West Philippine Sea nga sagad sa mga mananagat gihasi sa mga langyaw.
Gibana-bana nga 500 ka mga mangingisda ang naapektuhan sa kagubot sa Liguasan Delta.
Gipasalig sab ni 6th Infantry (Kampilan) Division Chief Brig. Gen. Cirilito Sobejana nga magpadayon ang paglutos sa militar sa mga terorista sa Maguindanao ug North Cotabato. (Edgar Fuerzas)