GIBUTYAG sa Commission on Election (Comelec) sa dakbayan sa Digos nga 239 ka mga kandidato sa Barangay ug Sangguniang Kabataan (BSK) elections ang ilang gikasohan.
Si Abogada Aimee Ferolino-Ampoloquio, city election officer, nagbutyag nga giduso nila ang kaso ngadto sa Comelec en banc human nakita nga milapas ang mga nakasohan sa Omnibus Election Code.
Si Ampoloquio nitataw nga mihimo og “operation baklas” ang Comelec dihang panahon pa sa kampanya kuyog ang kapulisan ug militar.
Nasuta nga gatusan ka mga kandidato ang misupak sa pagpamilit sa ilang campaign materials sama sa wa pagtuman sa poster designated areas ug milapas sab sa gitakdang sukod sa materyales o propaganda.
"Well, istrikto natong gipatuman ang balaod kay mao man ni ang mando sa nasyonal nga buhatan unya igo lang mi mituman,” asoy sa opisyal.
Dugang ni Ferolino nga ang uban sa mga nakasohan ang wa makalusot apan aduna sab mga midaog nga naapil sa kaso.
“Mag-depende na sa taas kun unsa ang ilang desisyon kay kun midaog sila unya mokanaog ang desisyon basin naay ma-diskwalipika sa ilang paglingkod,” pintok nga pahayag niini.
Samtang, nasayran sab nga aduna’y mga kandidatong napildi ug midaog ang wa maka-submitar sa ilang Statement of Contributions and Expenditures (Soce) human mitak-op ang deadline niadtong Hunyo 13.
Gitakdang ipaguwa sa Comelec ang listahan sa mga wa motuman sa Soce karong mosunod nga mga adlaw.
Nasayran sa SunStar SuperBalita nga apil ang barangay kapitan sa Colorado nga wa moabot sa gitakdang oras ang SOCE niini ug sa maong dapit, usa lang ka barangay kagawad ang nakasang-at og Soce.
Sa Hunyo 30 na molingkod ang mga bag-ong opisyal apan posibleng mag-atubang og suliran ang mga wa makatuman sa Soce tungod sa istriktong balaod sa Comelec.